Монголын театр, урлагийн байгууллагууд олон улсын хамтын ажиллагаагаа өргөжүүлж, дэлхийн театрын урлагийн сүлжээнд нэгдэх шинэ боломж нээлээ.
Соёл урлагийн газрын мэдээлснээр, Засгийн газрын хэрэгжүүлэгч агентлаг Соёл, урлагийн газрын дарга Г.Батхуяг “Торгоны замын олон улсын театрын холбоо”-ны удирдлагуудтай албан уулзалт хийж, хамтын ажиллагааны чиглэлээр санал солилцон, хамтран ажиллах эхлэл тавив.
Уулзалтаар Монголын театр, урлагийн байгууллагуудыг тус холбооны гишүүн байгууллагуудтай холбох, хамтарсан уран бүтээл туурвих, жүжиг, тоглолтын харилцан солилцоо хийх, айлчлан тоглолт зохион байгуулах, найруулагч, жүжигчин, уран бүтээлчдийн мэргэжлийн солилцоог хөгжүүлэх зэрэг асуудлыг хэлэлцжээ.
Мөн театрын менежмент, маркетинг, тайзны технологийн чиглэлээр туршлага солилцох, олон улсын театрын наадам, фестивальд Монголын уран бүтээлчид болон уран бүтээлийг оролцуулах боломжийн талаар ярилцсан байна.
“Торгоны замын олон улсын театрын холбоо” нь 2016 оны 10 дугаар сард БНХАУ-ын төрийн өмчит China Arts and Entertainment Group (CAEG)-ийн санаачилгаар байгуулсан олон улсын театр, тайзны урлагийн байгууллагуудын хамтын ажиллагааны сүлжээ юм. Анх 21 орны 56 гишүүн байгууллагатай үйл ажиллагаагаа эхлүүлж байсан тус холбоо өдгөө Ази, Европ, Америк, Латин Америк, Африкийн 48 улс, бүс нутгийн 188 театр, урлагийн байгууллагыг эгнээндээ нэгтгээд байна.
Тус холбоо нь гишүүн байгууллагын айлчлан тоглолт, хамтарсан уран бүтээл, театрын менежмент, тайзны технологийн туршлага солилцоо, залуу уран бүтээлчдийн мэргэжлийн ур чадварыг хөгжүүлэх зэрэг олон талт хөтөлбөр хэрэгжүүлдэг.
Энэхүү хамтын ажиллагаа нь Монголын театр, тайзны урлагийг олон улсад сурталчлах, үндэсний уран бүтээлийг дэлхийн үзэгчдэд хүргэх, уран бүтээлчдийн мэргэжлийн ур чадварыг дээшлүүлэх, гадаадын театр, урлагийн байгууллагатай хамтарсан төсөл, хөтөлбөр хэрэгжүүлэхэд чухал ач холбогдолтой юм.
