УДБЭТ-н хамт олон Мэргэжлийн найрал хөгжим үүсэж, хөгжсөний 90 жилийн ойд зориулан "MELODIA" симфони найрал хөгжмийн концертыг зохион байгуулна.
Энэ жил Монгол улсад мэргэжлийн найрал хөгжим үүсэж хөгжсөний 90 жилийн түүхэн дурсгалт хугацаа тохиож байна. Анх 1924 онд байгуулагдсан жанжин Сүхбаатарын нэрэмжит клубын дуу хөгжмийн бүлгэмээс үндэстэй. 1931 онд ардын цэнгэлдэх хүрээлэнг өргөтгөн улсын төв театр болгоход хөгжим анги гол суурь багана нь болж байсан. 1946 онд театрын симфони найрал хөгжмийн анхны концерт болж Л.Бетховены "Гуравдугаар баатарлаг симфони", "Эгмонт" удиртгалыг хөгжимджээ.
УДБЭТ-н симфони найрал хөгжим нь Монгол улсын дуурь, балет сонгодог урлагийг хөгжүүлэхэд гол үүрэг гүйцэтгэсээр ирсэн арвин их түүх, урын сантай чадварлаг хамт олон юм.
"MELODIA" симфони найрал хөгжмийн концерт 11-р сарын – 9ны 17цагт болно. Тус тоглолтонд ОХУ, ХБНГУ, Монгол улсад хөгжмийн мэргэжлийн сургуулиудыг төгссөн хөгжимчид оролцохоос гадна УДБЭТ-н симфони найрал хөгжим бүрэн бүрэлдэхүүнээрээ дан хөгжмийн бүтээлүүдийг тоглоно.
Дэлгэрэнгүй мэдээллийг 70110397, 99024933 утсаар аваарай.
www.URLAG.mn
