“Бодлын хулгайч”, “Дэв”, “Миний хөрш чөтгөр”, “Эх орон дуудаж байна” зэрэг уран бүтээлээр нь зургийн найруулагч Д.Ангарагийг кино сонирхогчид маань андахгүй сайн мэднэ. Тэрээр өнгөрсөн жил Оскарын шагнал гардуулах ёслолд уригдаж бүх арга хэмжээнд нь оролцож байсан удаатай.
Тэгвэл тэрээр энэ удаад Америкийн кино зураглаачдын холбооноос жил бүрийн хоёрудгаар сард зохион байгуулагддаг “Америкийн шилдэг кино зураглаач”-ийг шалгаруулах ёслол буюу "29th ASC Annual Awards" ёслолын бүх арга хэмжээнд өөрийн гэр бүлийн хамтаар оролцохоор болжээ. Эл ёслолд дэлхийн алдартай кино зураглаачид, найруулагчид, жүжигчид, дуучид, хүндэт зочид, шагналд нэр дэвшигчид, ивээн тэтгэгчид болон "Universal Studios", "Warner Bros", "Paramount Pictures", "Sony pictures" кино түгээгч компаниудын төлөөлөгчид зэргээс бүрдэх 1600 дэлхийн алдартай уран бүтээлчид оролцдог томоохон ёслолд зургийн найруулагч Д.Ангараг уригдсан гэнэ.
Холливуд төдийгүй дэлхийн алдартай уран бүтээлчидтэй мөр зэрэгцэн Эх орноо төлөөлөн оролцохоор болсон Д.Ангараг энэ тухайгаа өөрийн фейсбүүк хуудсандаа постолсон байсан юм.
Дашрамд сонирхуулахад Д.Ангараг Холливуд Монголын хамтарсан анхны уран бүтээлийн ажилдаа орсон бөгөөд тун удахгүй Холливудын уран бүтээлчдийг Монголд авчирахаар ажиллаж буй юм.
Э.ТЭКҮ
