Монголын киноны зах зээлд гадны сериалууд хүч түрэн орж, өөр улс орны соёл хүчтэй нэвтрэх болсон. Харин тэрхүү орон зайг нөхөх “Дэггүй хөрш” олон ангит инээдмийн кино 12-р сарын 15-наас эхлэн Монгол телевизээр үзэгчдийн хүртээл болох гэж байна. “Тэгт тойрог” кино компанийн 50 ангит уг бүтээлийн зохиол, бэлтгэл ажил 6 сарын хугацаанд үргэлжилж, өнгөрсөн 9-р сарын 5-ний өдрөөс эхлэн мотор дуугаргасны баяраа хийсэн билээ. 200 гаруй уран бүтээлчдийн хүч хөдөлмөр, нөр их ажлын үр дүнд дэлгэцээр гарахад бэлэн болж, киноны эвлүүлгийн ажил ид явагдаж байна.
Саваагүй ч гэх юм уу, дэггүй ч гэх юм уу энэ айл бол 4 хүүхэдтэй, эмэгтэйчүүдийн эмч 50 гаран настай Ува эмчийнхэн. Хөгжөөнтэй, инээдтэй, хоржоонтой, хорон, авууштай, санууштай гээд 50 өөр үйл явдал өрнөх тус киног бүхий л насныханд зориулан бүтээсэн байна. Тус киноны зохиолыг Ц.Одмаа, О.Урантуяа, Ц.Үүрцайх нар бичсэн бөгөөд продюсер Г.Гантуяа, ерөнхий найруулагч О.Урантуяа, ерөнхий зураглаач М.Өнөрбаатар, дууны найруулагч В.Бадарч, эвлүүлгийн найруулагч Б.Мягмарбаатар, зургийн дарга В.Мандах гээд уран бүтээлийн 40 гаруй хүний бүрэлдэхүүнтэй ажиллаж байна.
Гол дүрүүдэд УДЭТ-ын жүжигчин МУАЖ Г.Мягмарнаран, МУАЖ С.Сарантуяа, МУСТА А.Алтантөр, дуучин, МУСТА Г.Эрдэнэтунгалаг, жүжигчин Б.Эрдэнэбаяр , МУСТА Б.Хулан, Л гуардс хамтлагийн дуучин Д.Баясгалан, У.Энэрэл, жүжигчин Б.Ган-Өлзий нар тогложээ.
www.URLAG.mn
