2014 оны 12 дугаар сарын 7 -ны өдрийн 11:40 цагт Улсын Их Хурлын гишүүн хатагтай Ц.Оюунгэрэл Хөвсгөл аймгийн Мөрөн хотын хүндэтгэлийн хаалганд байрлах авто замын хэсэгт " Хөвсгөл аймгийн төвийг нийслэл Улаанбаатар хоттой холбох Мөрөн-Уньт чиглэлийн 253.3 км хатуу хучилттай авто замын нээлтийн ажиллагаа " -нд оролцлоо.
Улсын Их Хурлаас баталсан Шинэ бүтээн байгуулалт дунд хугацааны зорилтот хөтөлбөр, Шинэчлэлийн Засгийн газрын 2012-2016 оны үйл ажиллагааны хөтөлбөрт аймгийн төвүүдийг холбохоор тусгагдсаны дагуу Улсын төсөв, Монгол улсын Хөгжлийн банк, Гадаадын зээл тусламжийн хөрөнгө оруулалтаар авто замын салбарт их бүтээн байгуулалтын ажлыг эхлүүлэхээр ажиллаж байгаа билээ.
Өнөөдрийн байдлаар Хөвсгөл аймгийн төвийг нийслэл хоттой холбох 253.3 км хатуу хучилттай авто замын барилгын ажил дуусч авто замын хөдөлгөөнийг нээх ёслолын үйл ажиллагаа хийлээ.
Нээлтийн үйл ажиллагаанд УИХ-ын гишүүн Ц.Даваасүрэн, УИХ-ын гишүүн Л.Энх-Амгалан, ЗГХЭГ-ын Дэд дарга Ч.Сайнбилэг, Кувейт улсаас Монгол улсад суугаа элчин сайд эрхэмсэг ноён Мубарак М.Ф.Аль-Сехайжан болон Хөвсгөл аймгийн удирдлагууд тэргүүтэй төлөөлөгчид оролцлоо.
