2014 оны 12 дугаар сарын 16-ны Мягмар гаригийн 11:00 цагт Монгол төрийн түүхийн музейн гол танхимд УИХ-ын гишүүн хатагтай Ц.Оюунгэрэл өөрийн бичсэн ном болон өөрийн бэлгэнд авсан хөөрөгний даалинг Монгол төрийн түүхийн музейн сан хөмрөгт шилжүүлж хүлээлгэн өгөх ёслол боллоо.
Монгол төрийн түүхийн музейд хүлээлгэн өгч буй уг хөөрөгний даалинг Монголын нэрт уран хатгамалч С.Одончимэг ССАЖ-ийн сайд Ц.Оюунгэрэлд 2014 оны 7 сарын 8-нд "Т-батаар ба сор үзмэр" үзэсгэлэнгийн нээлтийн өдөр бэлэглэсэн бөгөөд уг хөөрөгний даалин 5 сая төгрөгийн үнэтэй ажээ. Уран хатгамалч С.Одончимэг нь Монгол улсын Ардын зураач А.Сэнгэцохио гуайн охин юм. С.Одончимэгийн ээж А.Цэрэнхүү нь удам дамжсан уран хатгамалчин хүн бөгөөд С.Одончимэг нь 13 настайгаасаа уран хатгамал хийж иржээ. Түүний хүү Б.Ганбаатар энэхүү хөөрөгний даалингийн ерөнхий загварыг гаргасан байна. Хөөрөгний даалинд зүү ороох оёдлоор урласан хээ угалз нь аавынх нь зохиомж бүтээл бөгөөд хөөрөгний даалинг оёсон утас нь ээжийнх нь өвлөн үлдээсэн торгон утас юм.
УИХ-ын гишүүн хатагтай Ц.Оюунгэрэл өөрийн бичсэн "Ногоон нүдэн лам" /'Миний ажлын ноу-хау", "Миний лобби", "Гэрт болсон яриа", "Америкт суралцсан тэмдэглэл", "Тарбозавр батаарын тухай үлгэр"/англи, монгол хэлээр/ номнууд болон "Хотол цагаан" радио жүжгийн зохиолын номыг Монгол төрийн түүхийн музейд өв сан болгон хүлээлгэн өглөө. Мөн тун удахгүй өөрийн бичсэн монгол бичгийн уран бичлэгийн бүтээлээ шинэчлэн хэвлэсэн "Нүүдэлчний яриа" номын хамт гардуулахаар бэлдэж байна.
www.URLAG.mn
