Бодлын хаяанд зэллэх солонго хөтлөн
Болор цагаан бороо шивнээд
Ээнэг элгээ дагсан хос тогоруу
Энэ л бороонд биесээ дуудахад
Ахин тохиохгүй учралын
Анхил дүрийг бодогдуулна
Дахилт:
Анир нугыг амилаасан бороо
Асралт хорвоог цаашлуулан шиврэнэ
Алсалсан цагийг айлсуулсан бороо
Танхил насыг наашлуулан шивэрнэ
Хүслийн тэнгэрт хөллөх солонго хөтлөн
Холын бүлээн бороо шавшаад
Ижил ижлээ түшсэн хос тогоруу
Ивлэх хуранд биесээ дуудахад
Эргэн ирэхгүй учралын
Эгэл зургийг санагдуулна
Дахилт:
Атарх нугыг амилаасан бороо
Тосох хорвоог цаашлуулан шиврэнэ
Алсалсан цагийг айлсуулсан бороо
Танхил насыг наашлуулан шиврэнэ
Үүрдийн орчлонд ургах солонго хөтлөн
Үдийн цагаан бороо товшоод
Зүүдэн зүсээ таньсан хос тогоруу
Зөөлөн бороонд биесээ дуудахад
Уяран уусаагүй алсын
Уйлган төрхийг бодогдуулна
Дахилт:
Цэцэгт нугыг сэрээсэн бороо
Тосох хорвоог цаашлуулан шиврэнэ
Цэнхэр цагийг сэргээсэн бороо
Танхил насыг наашлуулан шиврэнэ
