Улаанбаатар чуулгын гоцлол дуучин, МУСТА Дуламын Баасанжавын “Дунгаамаа” дуун цэнгүүн V/27-ны Лхагва гарагт Улаанбаатар чуулгын концертын танхимд болж өнгөрлөө. Уг тоглолтонд дуучин Д.Баасанжав өөрийн урын санд орсон ардын богино болон нийтийн дуунуудаас сорчлон үзэгч олондоо өргөн барьсан бөгөөд тоглолтын эхний хагас Улаанбаатар чуулгын “Хангарьд” үндэсний хөгжмийн найрал, ардын хөгжмийн тавал, шанз хөгжимтэй дуулсан дуунуудаас бүрдлээ.
Харин тоглолтын удаах хэсэгт тэрээр өөрийн дуулсан 13 “Маа”-гаасаа Хандармаа, Сүнжидмаа, Ундармаа, Бүжиймаа, Дунгаамаагаа дуулж үзэгч олноо баясуулсан юм.
Дуучин Д.Баасанжав 20 жилийн өмнө дуулж олноо алдаршсан “Дунгаамаа” дууны шүлгийг “Газар шороо” романыг зохиогч МУСГЗ, эрдэмтэн зохиолч Д.Маам өөрийн гэргий Б.Дунгаамаадаа зориулан бичиж, хөгжмийг Төрийн шагналт, хөгжмийн зохиолч Ц.Чинзориг бүтээж байжээ.
Тэгвэл “Дунгаамаа” дуун цэнгүүнд Шилмэл загварын хэмээн овоглогддог Дунгаамаа өөрийн биеэр ирж дуучинд гарын бэлгээ барьсан нь үзэгч олны сэтгэлийг хөдөлгөсөн сайхан мөч боллоо. Мөн Ундармаа дууг зохиогч МУ-ын ТШ, АУЗ, СГЗ Д.Цоодол тайзнаа гарч зохиол бүтээлийнхээ дээжийг “Төрдөө үнэлүүлээрэй” гэсэн ерөөлийн үгийн хамт өргөн барьхад үзэгчдийн алга ташилт, уухайн түрлэг танхимыг доргиох шиг болж байсан юм.
Уг тоглолтонд УДБЭТ-ын гоцлол дуучин, МУГЖ Ө.Уянга, Улаанбаатар чуулгын гоцлол дуучин, МУГЖ С.Ганзориг, МУСТА Д.Намсрайноров, түүний хүү дуучин Б.Баатархүү, UB Trio хамтлаг, Улаанбаатар чуулгын бүжигчид, “Хангарьд” үндэсний найрал хөгжим, удирдаач МУСТА Д.Нямдаш, Улаанбаатар циркийн уран бүтээлчид оролцож үзэгч түмэндээ бэлэг барьлаа.
www.Urlag.mn
