УДБЭТ-ын гоцлол дуучин МУГЖ Э.Амартүвшин BBC агентлагаас хоёр жил тутамд зохиогддог “Cardiff Singer of the World” уралдаант шалгаруулалтад оролцож дэлхийн шилдэг 20 дуучны нэг болсон. Тэгвэл шилдэг 20 дуучин сүүлийн гурав хоногийн турш зохиолын дууны төрөлд хүч сорьж, дөрөв дэх хэсгийн тоглолтын дараа шилдэг таван дуучныг тодруулснаа шүүгч нар зарлажээ.
Дуучид дөрөв дэх хэсгийн тоглолтод тав таваараа хуваагдан өрсөлдөж байгаа. Манай дуучны хувьд Африк, Америк, Франц зэрэг улсын дуучидтай нэг хэсэгт орж өчигдөр орой 20.00 цагт дуулсан юм.
Ийнхүү 32 жилийн түүхтэй нэр хүндтэй уралдаанд Монгол улсаа төлөөлөн анх удаа оролцож буй, гавьяат жүжигчин Э.Амартүвшин шилдэг тавын нэгээр тодорч, ирэх баасан гаригт тэргүүн шагнал, цомын төлөө өрсөлдөх эрхтэй болсон юм. Шилдэг тавд Канад, Турк, Беларус, БНСУ-ын дуучид багтжээ.
Эх сурвалж: Mэдээ.мн
