Монголын хамгийн олон сонсогч, шүтэн бишрэгчтэй дуучнаар тодроод байгаа Rokit Bay буюу Пуужин Баярааг хүүхэд, залуус андахгүй сайн мэднэ. Тэрбээр сүүлийн өдрүүдэд “Авъяаслаг монголчууд” шоуны шүүгчийн дүрээр ням гараг бүр цэнхэр дэлгэцээр та бидэнтэй уулзах болсон билээ. Түүний наргианч зан, өрөвч зөөлөн сэтгэл, шудрага зан нь дунд эргэм насныхан болоод ахмадуудаас онц үнэлгээ авах болсон. Түүний “Нэг өдрийн хаан”, “Бор арьст Гаамп”-ыг найман настай балчираас наян настай буурал хүртэл мэднэ. Тэгвэл дуунас бусдаар тэр хэн бэ гэдгийг та бүхэндээ сонирхуулж байна.
Тэрбээр Улаанбаатар хотод төрсөн, дөрөвдүгээр хороололын унаган хүү бөгөөд 77-р сургуулийг төгсчээ. Харин одоогоор эхнэр аваагүй бөгөөд ээж, эгчийн хамт амьдардаг аж.
Түүнийг дөрвөн настайд аав нь өөд болсноор тэр эмээгийн амины ганц ач хүү болж үлдсэн түүхтэй. Түүнийг Америкаас ирсэнийх нь дараа буюу энэ зэрэгт хүрч амжаагүй байхад нь эмээ нь өөд болжээ. Тиймээс тэр эмээдээ сайн яваагаа үзүүлж чадаагүйдээ их харамсдаг хэмээн ярьж байсан.
Rokit Bay багадаа зохион бүтээгч болохыг мөрөөддөг байсан бөгөөд дунд сургуульд сурч байхдаа тэр зураг болон биеийн тамирын хичээлдээ дуртай байж. Одоо зураг зурах хобиттой юм байна.
Рэппэр залуу маань Пуужин Баяраа буюу Rokit bay нэрээр олонд танигдсан ч түүний жинхэнэ нэрийг О.Баярсайхан гэдэг.
О.Баярсайхан ШУТИС-ийн КТМС-ын компьютер графикийн ангиасаа гарч АНУ-руу бизнесийн удирдлага маркетингийн чиглэлээр суралцахаар болоод тэндээ таван жил амьдарчээ. Ингээд түүнд АНУ-д үргэлжлүүлэн сурч жирийн ажилчин болох эсвэл дуртай зүйлээ хийж дуугаа дуулах гэсэн хоёр сонголт гарч ирсэн байна. Ингэхдээ тэр дуулахыг илүүд үзээд сургуулиа орхижээ. Rokit Bay гэдэг нэр гурван өөр утгатай.Эхнийх нь Rock it Bay буюу Доргиогоод өг, Баяраа. Хоёр дахь нь Rocket Bay буюу Пуужин Баяраа. Аюултай ч амжилттай хөөрвөл хэний ч хүрээгүйд хүрнэ гэсэн утгатай. Сүүлийнх нь Raw kit Bay буюу хөгжмийн амьд дуугаралт гэсэн үг юм байна.
Тэрбээр 2009 онд бvтээгдсэн “Маргаашгvй” УСК юм. Түүний дараа нь "Big fish", “Алтан элс” зэрэг кинонд тогложээ. Мөн дууныхаа үг аяыг өөрөө зохиож, миксингээ хийж, CD-ний cover дизайнаа хийдэг аж. Мөн шаардлагатай бол клипнийхээ эвлүүлгийг ч хийчихдэг хөдөлмөрч нэгэн юм билээ.
Түүний анхны бие даасан тоглолт 2011 оны 11 дугаар сарын 03 нд UB palace-д болсон бөгөөд амьд тоглолт видео хосолсон өвөрмөц тоглолт байсан аж.
О.Баяраа аль хэдийн олны танил нэгэн болсон ч “од” гэдэг үгэнд тун дургүйгээр барахгүй өөрийгөө ч од гэж боддоггүй байна.
Учир нь манайд од гэдэг үгний үнэ цэнэ алдагдаж, доромжлол, егөө утгаар хэрэглэдэг болчихсоноос тэр гэнэ.
Тэр чөлөөт цагаараа олон ангит кино үзэх дуртай. Гэхдээ солонгос кино нэгийг ч үзэж байгаагүй бөгөөд бичлэг сайтай кино үзээд хэвтэх нь түүнд сайхан амралт болдог аж.
Тэрбээр Америкт сурч байх хугацаандаа Номин хэмээх бүсгүйтэй online–аар танилцан, үерхдэг байжээ. Тэд өөр өөр хотод амьдарч байсан ч үүнийгээ алсын зайны үерхэл хэмээн ярьдаг байсан гэнэ. Тэд өдөр бүр интернэтээр харилцдаг байсан ч Rokit Bay салах шийдвэр гаргаснаар эхний бөгөөд сүүлийн удаа уулзсан юм билээ.
Тэр хуучин найз бүсгүйдээ зориулан “Бид хоёр” хэмээх дуугааа хийжээ. Ингээд 30 гартлаа гэрлээгүй байгаа шалтгаан нь санаад нийцэх эмэгтэй таарахгүй байгаатай нь холбоотой гэнэ. Дашрамд дуулгахад түүнд бүх юм нь зохицсон, ухаалаг, сайхан сэтгэлтэй эмэгтэй таалагддаг ажээ.
Н.Ганчимэг
