Улсын хэмжээнд үйл ажиллагаа явуулаж байгаа мэргэжлийн урлагийн байгууллагууд хорт хавдрын эсрэг аянд дуу нэгтэйгээр нэгдлээ. 21 аймгийн театр чуулга, нийслэлд үйл ажиллагаа явуулж буй улсын 7 байгууллага (УДБЭТ, УДЭТ, ҮДБЭЧ, Улсын филармони, Улсын хүүхэлдэйн театр, ЦДБЭЧ, ХЦДБЧ) уг аянд нэгдэн өөрийн шилдэг уран бүтээлүүдийг тавдугаар сарын 14-ний өдөр нэгэн зэрэг толилуулах гэж байна.
Тодруулбал, Улсын дуурь бүжгийн эрдмийн театр 17.00 цагаас Ц.Нацагдоржийн “Үүлэн заяа” дуурь, Улсын драмын эрдмийн театр 17.00 цагаас В.Шекиспир “Ромео Жулетта” жүжиг, Үндэсний дуу бүжгийн эрдмийн чуулга “Монголын их хатад” бүжгэн жүжиг, Улсын филармони “Бид нэг гэр бүл” тоглолт, Улсын хүүхэлдэйн театр 14.00, 17.00 цагуудаас “Мял Богдын намтар” жүжиг, Цэргийн дуу бүжгийн эрдмийн чуулга “Сүлд хийморийн дуулал” тоглолт, Хилийн цэргийн дуу бүжгийн чуулга “Халуун сэтгэлийн дэм” тоглолтуудын тус тус тоглохоор бэлтгэл ажлаа хангаад байна.
Дэлхий дахинд элэгний хорт хавдрын өвчлөл 100.000 хүн тутамд 3-4 тохиолддог бол Монгол улсад 100.000 хүн тутамд 80-90 тохиолдож байгаа нь дэлхийн улс орнуудыг энэ өвчлөлөөр тэргүүлэх болсон харамсалтай статистик үзүүлэлт байна. Монгол улсад элэг шилжүүлэн суулгах мэс засал хийх бүрэн боломжтой бөгөөд тоног төхөөрөмж байхгүйн улмаас хийж чаддаггүй аж. Энэхүү тоног төхөөрөмжийг авахад шаардагдах 1 тэрбум төгрөгийг цуглуулах үйл ажиллагаанд урлагийнхан манлайлан нийт монголчуудаа уриалан дуудах аянд нэгдлээ.
Тоглолтуудын тасалбар 10000 төгрөгийн үнэтэй бөгөөд бүх орлого “Элэг нэгт Монголчууд сан”-д хандив болон орно. Иймээс үзэгч та бүхэн амралтын өдрүүдээр бидний тоглолтыг үзэн элэг нэгт монголчууддаа дэмжээрэй.
“ЭЛЭГ БҮХНИЙ ТӨЛӨӨ 10000” АЯН
