"Таны таталбар зураг-4" өдөрлөг 5 сарын 21-ны 12:00-16:00 хооронд болно. Урлагт хайртай та бүхэн урлагийн бүтээлийн хэсэг болох, уран бүтээлчид таталбар хийхийг уриалж байна.
“Blue Moon” арт галерей таталбар зургийн өдөрлөгийг жил бүр уламжлал болгон зохион байгуулдаг бөгөөд 4-дэх удаагаа зохион байгуулах гэж байна. “Таны таталбар зураг-4” нээлттэй өдөрлөг нь уран бүтээлчдийг дэмжих, уран бүтээлчид болон урлагт хайртай хүмүүсийг холбож урлагийн тухай яриа өрнүүлсэн ээлжит урлагийн өдрийг урлагт хайртай та бүхэндээ “Blue Moon” арт галерейн орон зайд бүрдүүлдэг.
Энэ өдөр хүрэлцэн ирсэн зочид өөрийн биеэр натур болгон өдөрлөгт оролцох боломжтой ба нийт өдөрлөгт ирсэн уран бүтээлчдийн дунд таталбар зургийн тэмцээн зохион байгуулж, урамшуулдаг уламжлалтай.
Таталбар зураг богино хугацаанд зурагддаг учраас хурд, мэдрэмж, чадвар шаарддаг. Ажиглалт бол зураачийн ажлын гол үндэс тийм ч учраас амьдарлыг судлан өөрийнхөө бүтээлийн сэдвийг жижиг эскиз, таталбар зургуудаас олж авдгаараа онцлогтой. Таталбар, судалбар зургийг улам идэвхитэй хийж дадал болгох нь уран бүтээлчийн чадвар өсөх боломжийг өгдөг учраас энэхүү өдөрлөгт чухал ач холбогдолтой хэмээн үзэж “Blue moon” арт галерейгаас санаачлан орчин бүрдүүлж дэмжиж буй алхам юм. Уран бүтээлчид болоод уран зураг сонирхогч хоорондоо холбогдох хамгийн ойр гүүр бол таталбар зураг юм.
Өдөрлөгт хүрэлцэн ирсэн уран бүтээлчид гартаа цаас харандаагаа бариад урлагт хайртай хүмүүстэйгээ уулзах нээлттэй өдөр байх юм. Хүн бүхэнд өөрийгөө зуруулах, уран бүтээлийн сэдэв болох хүсэл сэтгэлийн гүнд оршиж байдаг гэдэгтэй санал нийлнэ биз. Энэ өдөр таны хүсэл биелнэ гэдэгт итгэж байна.
Уг өдөрлөг 2016 оны 5-р сарын 21 Бямба гаригийн 12:00-16:00 цагийн хооронд “Blue moon” арт галерейн үзэсгэлэнгийн танхимд үргэлжлэх бөгөөд дэлгэрэнгүй мэдээллийг 88850812, 89806021 дугаарын утсаар лавлана уу.
