Монголчууд бид жил бүрийн долдугаар сард үндэсний их баяр наадмаа ёслол төгөлдөр хийж баярлан цэнгэж, бахархан нааддаг билээ. Энэ жил Тулгар төрийн 2225, Их Монгол Улсын 810, Ардын хувьсгалын 95 жилийн тэгш ой тохиож буй түүхэн жил юм. Гэтэл түүхэн баяр наадмын сураг ажиг ер алга, хаа сайгүй л сонгууль сонгууль гэсэн хүмүүс байна.
Түмэн олны сонссон ганц мэдээлэл гэвэл наадмын нээлт, хаалтын тоглолтын найруулагчаар УДЭТ-ын найруулагч Н.Наранбаатар ажиллахаар болжээ гэхээс өөр зүйл байдаггүй ээ. Уг нь баяр наадмын үндэсний хорооны ээлжит хурал энэ сарын 17-нд болж, баяр наадмын төсвийн төслийг хэлэлцэн Засгийн газрын хуралдаанд танилцуулахаар болсон гэж байгаа. Тус хурлын үеэр баяр наадмын комиссын дарга, шадар сайд хэлэхдээ “Баяр наадмын бэлтгэлийг эртнээс сайтар базааж, хурдан морьдын уралдаан, бөхийн барилдаан, сурын тэмцээн нь маргаангүй, урлаг, соёлын арга хэмжээнүүд нь наадамчдын сэтгэлд хүрсэн сайхан наадам болгохыг хичээж ажиллан эртнээс бэлтгэлээ базаах хэрэгтэй” гэсэн гэдэг. Гэтэл одоогийн байдлаар наадамд бэлтгэх нь байтугай, наадмын төсвөө ч батлаагүй байгаа нь ажлууд эхлээгүй байгааг харуулж байна.
Энэ янзаараа энэ жилийн баяр наадам болох юм уу болвол ямар наадам болох вэ гэдэг нь эргэлзээтэй л байна. Сүүлийн саруудад УИХ-ын ээлжит сонгууль, Асемийн уулзалттай холбоотойгоор улс төрчид, сайд дарга нар баяр наадмын тухай бодохыг ч хүсэхгүй байх шиг. Тэдний хувьд ирэх сонгуульд гайгүй санал авч ирээдүйн 4 жилээ тансагхан өнгөрүүлэх л чухал бололтой. Уг нь өмнөх жилүүдэд өдийд наадмын бэлтгэл ажил эхэлчихсэн ид өрнөж байдаг байлаа. Иймэрхүү байдлаар энэ жилийн наадам болох юм уу.
Н.Чимэг
