Засгийн газрын 2010 оны долоодугаар сарын 7-ны өдрийн 172 дугаар тогтоолоор баталсан “Түүхэн үйл явдлын ой, тэмдэглэлт өдрийг тэмдэглэх, гавьяат үйлстнийг алдаршуулах, дурсгалыг нь мөнхжүүлэх журам”-ын 4.1.27 дугаар заалтын дагуу жил бүрийн есдүгээр сарын хоёр дахь ням гарагт Соёл, урлагийн ажилтны өдрийг тэмдэглэн өнгөрүүлдэг болсон билээ.
Энэ өдрийг 1993 оноос эхлэн тэмдэглэж ирсэн бөгөөд өдгөө 23 дахь жилдээ тэмдэглэн өнгөрүүлсэн юм. Энэ жилийн “Соёл урлагийн ажилтны өдөр”-ийг спортын наадам, нийгэм хүмүүнлэгийн ажил, эрүүл агаар, эрч хүч гэсэн гурван чиглэлээр зохион байгууллаа.
Спортын наадмыг энэ сар 3, 4-ний өдрүүдэд зохион байгуулж, урлаг, соёлын байгууллагын дунд шатар, сагсан бөмбөг, гар бөмбөгийн тэмцээнийг явуулсан байна. Харин энэ сарын 10,11-нд Чингисийн хүрээ цогцолборт “Эрүүл агаар, эрч хүч” уриан дор өдөрлөгийг амжилттай зохион байгууллаа.
