Монгол Улсын Ардын жүжигчин, Хөдөлмөрийн баатар, Төрийн соёрхолт, Фукуокагийн азийн соёлын шагналт, профессор Намжилын Норовбанзад гуай Монголын Соёл Урлагийн их сургуулийн уртын дууны багш нарыг бэлтгэх, сургалтын дэг тогтоох, хөтөлбөр боловсруулахад тулгын чулууг нь тулсан эрхэм хүн юм. Одоо СУИС-д түүний гарын шавь нар, тэдний шавь нар ажиллаж, багшийнхаа дэг, сургалтаар уртын дуучдын хойч үеийг бэлтгэж байна.
Их дуучны мэндэлсний 85 насны ойг СУИС-ийн эрдмийн хамт олон 2016 оны намрын дунд улаагчин тахиа сарын долооноос есний өдрүүдэд үр хүүхэд, шавь нар, анд нөхдийнх нь санаачлан байгуулсан “Норовбанзад” сантай хамтран тэмдэглэж буй дор Норовбанзад гуайн нэрэмжит олон улсын уртын дуучдын уралдааныг хоёр ангиллаар зохион байгуулсан юм. Тус тэмцээний “Б” буюу “Авьяастан” ангилалд Б.Хүрэлбаатар түрүүлж, Г.Оюун-Эрдэнэ, М.Өлзийбат, С.Дэлгэрмаа нар удаалав.
Харин “А” буюу “Мэргэжлийн дуучдын ангилал”-д “Хос шарга” дууны эзэн, ҮДБЭЧ-ын дуучин Ц.Түмэнжаргал тэргүүн байрт шалгарлаа. Уралдаанд 201 уртын дуучин өрсөлдсөнөөс хамгийн бага нь Дундговь аймгаас 8 настай охин, ахмад нь 86 настай дуучин байв.
