“Хар сарнай”-гийн Амараагийн төрсөн дүү жижиг Амараатай хамтран дуулсан “Хатариш” дуугаараа “хаданд гарч”, жаахан хүүхдүүд, өсвөр үеийнхэн, залуучуудын шүтээн болсон Мино шинэхэн байгуулагдсан “Эмоци” хамтлагийн гишүүн болж, хөдөө орон нутгаар аялан тоглож яваад саяхан нийслэлд ирсэн. “Х ТҮЦ”-ийн Төөтөө, Тэмка, Нарансолонго гурвын үүсгэн байгуулж, тулгын чулууг нь тавьсан “Эмоци” хамтлагийн бүтээл, өнгө аяс нь өнгөлөг, жавхаалаг, цоглог, золбоолог гэдэг үг л дүйцэхээр байгаа.
Тус хамтлагийнхан хөдөө орон нутгаар явахдаа ч нийгмийн сүлжээнд байнга холбогдож, явсан газрынхаа сонин сайхныг зураг хөрөгтэйгөө оруулдаг байсан. Мино ч Эмоци хамтлагийнхантай гар нийлж ажиллаж байгаад хувийн амьдралаа бодож гэртээ суух болсон гэдэг. Эрх танхил өссөн Мино эрхийн балай байхаа больж, хадамд гарч үзээд, бас төрхөмдөө буцаж үзэж, амьдралын сайн муу, жаргал зовлонг өөрийнхөө хэрээр л туулж яваа. Хорьж болдоггүй 20 насандаа хадамд гарч, гурван сарын дараа гэрлэлт нь бүтэлгүйтэж, хориотой 21 нас гэж өөрийнхөө сэтгэлийг чагнаж, биеэ хорьж явсан Мино
“Залуу насны минь хайр
Залруулах гээд хэрэггүй
Загас усанд л байх ёстой шиг
Засах эрхгүй дурсамж бий” гэж бичиж үлдээсэн нь нэг бодлын 100 хувь үнэн ч юм шиг. Мино хорьхон насандаа Булган хангай нутгийн хүү Дамбын Хишигжаргалын ууган хүү Х.Мөнхжинтэй нижгэр хурим хийж, гал голомтоо бадраасан. Хорьж болдоггүй 20 нас гэж хөөрч явсан Мино гуравхан сарын дараа төрхөмдөө буцаж, хориотой 21 нас гэж өөрийгөө барьж, дарж явсан. Гэвч хүний сэтгэл хэнд ч хоригдож хүлэгддэггүй болохоор Мино дахин амьдрал зохиож, анх хамтран амьдарч явсан Өвөрхангайн алтны магнат Бямбасүрэнтэй хамтдаа амьдарч, хөөрхөн хүүгийн ээж болсон. Олны өмнө гардаггүй чимээгүй амьдралыг эрхэмлэх болсон Мино хүүгийнхээ эцгээс туурга тусгаарлаж, ганц бие залуухан ээж болжээ.
