Монголчуудыг гэр бүлээр нь цэнхэр дэлгэцийн өмнө уяж чадсан “Авъяаслаг Монголчууд” шоу энэ жилийн ялагчаа хэдхэн хоногийн өмнө зарласан. Энэ жилийн ялагчаар хуучин цагийн кантри урсгалыг оруулж ирж чадсан дуучин О.Энх-Эрдэнэ шалгарч, 100 сая төгрөгийн эзэн болсон юм.
Яг энэ мөчид хүмүүс өнгөрсөн жилийн “Авъяаслаг Монголчууд” шоуны ялагч “Эгшиглэнт чимээ” хамтлагийнхныг эрж, сурж эхэлсэн. Тэгвэл Дархан-Уул аймгаас оролцсон 35 хүүхдийн бүрэлдэхүүнтэй “Эгшиглэнт чимээ” хамтлагийнхан ирэх оны дөрөвдүгээр сарын 12-нд анхны бие даасан тоглолтоо хийхээр болж, аль хэдийнэ бэлтгэл ажилдаа орчихоод явж байгаа гэнэ.
Тус хамтлагийн багш, Монгол Улсын гавьяат багш С.Жамъяанхорол гуай тун удахгүй бие даасан тоглолтоо хийх тухайгаа ярьжээ. Мөн тэрбээр “Тухайн үед дурсгалын зүйл өгч, биднийг машинаараа зөөж, хоол унданд оруулж өгсөн хүмүүс олон бий. “Нэг хүн 60 сая төгрөг өглөө” гэсэн мэдээлэл гарч л байсан. Эхэндээ түүнийг “Хүүхдүүдийн авъяасыг үнэлдэг торгон мэдрэмжтэй залуу юм” гэж баярлаж байсан. Гэхдээ одоо болтол өгөөгүй. Гэтэл зарим нэг хүмүүс намайг тэр 60 сая төгрөгөөр юу хийсэн. Бараг чи идээд уучихсан уу. Тэрэндээ хахаж үхээрэй гэх мэт их муухайгаар хэлж байсан.
Өнгөрсөн хавар зургадугаар сард зарим хэвлэл мэдээллийн хэрэгслээр миний шанаагаа тулаад сууж байгаа зургийг тавиад “С.Жамъянхорол багш 60 сая төгрөгөө хүлээсээр л байна” гээд мэдээ гаргачихсан байсан. Ядаж байтал яг маргааш нь би хот явахаар болоод автобусанд суугаад явж байсан чинь хүмүүс “мөнгөө авахаар явж байгаа юм уу” гэцгээгээд байсан. Надад тэр мөнгийг хүлээж тэгж шанаагаа тулж суусан удаа байхгүй ээ. Гэхдээ хоёрын хооронд тэгж худлаа хэлж өөрийгөө ч, намайг ч эвгүй байдалд оруулж байхаар зүгээр 100 мянган төгрөг өгөөд хүүхдүүдээ баярлуулаад зайрмаг аваад өгчхөөрэй гээд өгсөн бол насандаа мартамгүй их баярлах байлаа.
Би хамтлагийнхаа хүүхэд бүхэнд банкинд хадгаламжийн данс нээгээд мөнгийг нь хийж өгсөн. Манай 35 хүүхэд 18 нас хүрээд тус бүртээ 50 сая төгрөгтэй болно. Мөн шавь нарынхаа эцэг, эх тус бүрт нь 100 мянган төгрөг өгсөн. Ерөнхийлөгч, Ерөнхий сайд, БСШУ-ны сайд тус бүртээ гурван удаа биднийг дуудсан. Тэгэхэд зөвхөн замын зардал 900 мянга, 900 мянга 900 мянга гээд 1.8 сая төгрөг шууд гараад явчихсан. Энэ мэт зүйлд зарцуулагдсан. Түүнээс биш зарим хүмүүсийн яриад байсан шиг би тэр мөнгийг авч зугтаагүй” хэмээн ярьжээ.
