Олон улсын эмэгтэйчүүдийн эрхийг хамгаалах өдрийг тохиолдуулан Төв аймгийн Зуунмод хотноо “Миний сайхан ээж-1000″ хүндэтгэлийн цэнгүүн болж өнгөрлөө. Уг арга хэмжээг "Төв аймгийн Залуучуудын холбоо" ТББ болон Зүүний хүчний холбооноос санаачлан аймгийн Засаг Даргын Тамгын газар, Зуунмод сумын ЗДТГ-тай хамтран хоёр дахь жилдээ уламжлал болгон зохион байгуулж байгаа юм. Энэ удаагийн хүндэтгэлийн цэнгүүн Төв аймгийн бүх сумдын ээжүүдийг хамарсан бөгөөд 1300 орчим ээжүүд нэг дор чуулсан нь өмнөх жилийнхээс онцлог байв.
Арга хэмжээнд УИХ-ын гишүүн Н.Энхболд уригдаж ирж ээжүүдэд баярын мэндчилгээ дэвшүүлсэн бол Ардын жүжигчин А.Долгор, МУСТА Т.Дэлгэрмөрөн зэрэг урлаг соёлын алдартнууд хүрэлцэн ирж эхийн сайхан дуунуудаараа ая дуугаа өргөсөн юм. Түүнчлэн энэ үеэр Улс нийгэмдээ үр бүтээлтэй ажиллаж хөдөлмөрлөхийн зэрэгцээ олон сайхан үр хүүхэд төрүүлж өсгөсөн 90 гаруй ээжүүд, эхчүүд төрийн болон яам агентлаг, Аймаг сумын хүндэт тэмдэг, жуух, Залуучуудын холбооны тэргүүн зэрэг олон шагналын эздээр тодорсон юм. Энэ дашрамд дуулгахад энэ үйл ажиллагаа жил бүр уламжлал болон зохион байгуулагдана гэдгийг зохион байгуулагчдын зүгээс дуулгасан нь ээжүүд, эмэгтэйчүүдийн талархалыг ихэд хүлээсэн үйл явдал болсон юм.
