Нийслэлийн Ерөнхий боловсролын сургуулиудын хөгжмийн хичээлийн сургалтыг чанаржуулж, өсвөр үеийнхэнд уран сайхны боловсрол олгох, гоо зүйн хүмүүжлийг төлөвшүүлэх, хүүхэд бүрийн авьяасыг хөгжүүлэх зорилгоор Нийслэлийн Засаг даргын ивээл дор уламжлал болон зохиогддог Монгол Улсын Хөдөлмөрийн баатар, Төрийн шагналт, Ардын жүжигчин Дагвын Лувсаншаравын нэрэмжит “Хүүхдийн найрал дууны шилдэг хамтлаг шалгаруулах 25 дахь удаагийн уралдаант наадам”-ыг амжилттай зохион байгуулж дүнгээ гаргасан билээ.
Наадмын I-р шат 2017 оны 10 дугаар сарын 11, 12, 13-ны өдрүүдэд амжилттай зохион байгуулагдсан бөгөөд нийслэлийн 9 дүүргийн 88 ерөнхий боловсролын сургуулиуд оролцож авьяас, ур чадвараараа өрсөлдөж, төгсгөлийн шатны шалгаруулалтыг 2017 оны 10 дугаар сарын 18-ны өдөр Монголын Хүүхдийн Ордонд зохион байгуулсан бөгөөд тус шалгаруулалтад анхан шатны шалгаруулалтаас шалгарсан 9 дүүргийн 21 сургууль өрсөлдөж шилдэг хамтлагууд тодорсон юм. Тус наадмын нэгдсэн Гала тоглолт 2017 оны 10 дугаар сарын 28-нд буюу маргааш Соёлын Төв Өргөөнд зохион байгуулагдана.
Маргааш гала тоглолтод оролцох эрхээ авч шилдгээр шалгарсан хамтлагуудыг танилцуулвал,
– Д.Лувсаншаравын нэрэмжит шагналаар Хан-Уул дүүргийн 18 дугаар сургууль,
– Тусгай байрыг Хан-Уул дүүргийн 52 дугаар сургууль, Баянгол дүүргийн 28 дугаар сургууль тус тус эзэлсэн бол
– 3 дугаар байранд Чингэлтэй дүүргийн 50 дугаар сургууль
– 2 дугаар байранд Сүхбаатар дүүргийн Монгол-Оросын хамтарсан 3 дугаар сургууль
– Тэргүүн байранд Баянгол дүүргийн Эрдмийн өргөө цогцолбор сургууль
– Уралдааны шилдэг удирдаач багшаар Баянгол дүүргийн Эрдмийн өргөө цогцолбор сургуулийн удирдаач багш Л.Отгонцэцэг,
– Шилдэг найралжуулагч багшаар Сонгинохайрхан дүүргийн 62 дугаар сургуулийн хөгжмийн багш Н.Ариунболор нар тус тус шалгарчээ.
