Хүн төрөлхтний соёлын үнэт өв болсон театрын урлаг үүсч хөгжин өнөөдрийг хүрэхдээ хэдэн мянган жилийг үджээ. “Театр” хийгээд театрын урлаг бүхий л цаг үеийнхээ туршид хүн төрөлхтний оюун санааны эх булаг болон оршин тогтнож амьдралын үнэ цэнэ, хүний мөн чанар, хөгжил дэвшлийн уриа цуурай, үнэн мөн, сайн сайхны мөнхийн дуулал болсоор байна.
Жил бүрийн 03 дугаар сарын 27-ны өдрийг дэлхийн “Театрын өдөр” болгон тэмдэглэн өнгөрүүлдэг уламжлалтай бөгөөд энэ өдөр бол дэлхийн өнцөг булан бүрт буй театрын урлагийн уран бүтээлчид хийгээд театрын урлагийн үнэнч үзэгч хэн бүхний баярын өдөр юм.
Манай улс 1962 оноос "Театрын өдөр"-ийг тэмдэглэж ирсэн бөгөөд сүүлийн арав гаруй жилийн турш театрын урлагийн шилдгүүдийг тодруулан, алдаршуулдаг "Гэгээн муза" наадмыг амжилттай зохион байгуулж ирсэн юм. Харин энэ жилийн хувьд "Гэгээн муза" наадмыг ирэх тавдугаар сард зохион байгуулахаар болж, хугацааг товлосон билээ.
