Тулгар төрийн 2229, Их Монгол Улс байгуулсны 814 жил, Ардын хувьсгалын 99 жилийн ой, Үндэсний их баяр наадмын хүрээнд зохион байгуулагдах “Улаанбаатарын үдэш 2020” наадмын үдшийн шоу тоглолтыг дэлхийн олон улсад тархаж, Монгол Улсад зөөвөрлөгдөн орж ирсэн шинэ төрлийн коронавирусын улмаас Улс, Нийслэлийн Онцгой комиссоос гаргасан шийдвэрийн дагуу онлайн хэлбэрээр зохион байгуулах ажлын гүйцэтгэгч байгууллагыг сонгон шалгаруулна.
Сонгон шалгаруултад Монгол Улсын иргэн, аж ахуй нэгж, мэргэжлийн болон чөлөөт уран бүтээлчид, хамтарсан мэргэжлийн баг төсөл боловсруулан оролцох боломжтой бөгөөд төсөл ирүүлэгч нь урьд өмнө нь зохион байгуулж байсан соёл, урлагийн чиглэлийн томоохон үйл ажиллагаануудын товч мэдээлэл болон найруулагчийн ур чадварыг илтгэх танилцуулга, онлайн хэлбэрээр зохион байгуулах шоу тоглолтын хөтөлбөр, найруулгын саналаа боловсруулан төсөл хэлбэрээр битүүмжлэн ирүүлэх ба материалыг 2020 оны 06 дугаар сарын 29-ны өдрийн 12:00 цагаас өмнө Нийслэлийн Соёл, урлагийн газрын бичиг хэргийн ажилтанд хүлээлгэн өгсөн байна.
“Улаанбаатарын үдэш” наадмын үдшийн онлайн шоу тоглолтын зохион байгуулагчийн сонгон шалгаруулалтад төсөл ирүүлэгч нь дараах шаардлагыг хангасан байна. Үүнд:
- Нийтийг хамарсан томоохон шоу тоглолт, эвэнт арга хэмжээний хөтөлбөр найруулгыг хариуцан зохион байгуулж байсан туршлагатай байх;
- Хөтөлбөр найруулгын агуулга нь иргэд, олон нийтийн сэтгэхүйд нийцсэн, үндэсний өв соёл, түүхэн уламжлалыг орчин цагийн урлагтай хослуулсан агуулгатай байх;
- Онлайн шоу тоглолтын тайзны засал чимэглэл, хөгжмийн дуугаралт, гэрэл болон дүрсний эффект зэргийг хөтөлбөр найруулгатайгаа уялдуулан гаргасан байх;
- Хөтөлбөрийн үргэлжлэх хугацааг 2020 оны 07 дугаар сарын 11-ны өдрийн
21:00-24:00 цагийн хооронд байхаар төлөвлөж телевизийн сувгууд болон сошиал хуудсуудаар түгээж олон нийтэд хүргэхээр бэлтгэсэн байх; - Хөтөлбөр найруулгад багтсан уран бүтээлчдийн урамшуулал, бусад ажлын төсвийг үнэн зөв бодитоор тооцож гаргасан байх;
- Өмнөх жилүүдийн “Улаанбаатарын үдэш” шоу тоглолтын хөтөлбөр, найруулгын агуулгатай давхцуулаагүй байх;
Нийслэлийн Соёл, урлагийн газрын даргын тушаалаар батлагдсан Ажлын хэсгийн бүрэлдэхүүн сонгон шалгаруулалтад оролцогчдын ирүүлсэн төслийг ил тод, шударга өрсөлдөөний зарчимд тулгуурлан дээрх үндсэн шалгуур үзүүлэлтүүдийн дагуу шалгаруулна.
Шалгарсан төслийг Нийслэлийн Засаг даргын тамгын газар болон үндэсний их баяр наадмын урлаг, соёлын зохион байгуулах салбар хороонд хүргүүлж, сонгон шалгаруулалтыг баталсны дагуу гэрээг байгуулж хамтран ажиллана.
Сонгон шалгаруулалттай холбогдолтой дэлгэрэнгүй мэдээллийг 11321529 дугаараар лавлах боломжтой.
