Сүүлийн үед манай уран бүтээлчдийн дунд бусдын дууг хулгайлах нь олширсон. Тэгвэл харь холын Америк улсад багагүй хугацаанд уран бүтээлээ туурвиж ажиллаж амьдарч байсан “Sweetymotion” хамтлаг хэзээ ч гадаадын дуу хулгайлаж дуулахгүй гэдгээ өнгөрсөн амралтын өдөр нэгэн телевизийн ярилцлаганд оролцохдоо мэдэгдлээ. “Бид яаран сандран халтуурны уран бүтээл хийхийг боддоггүй.
Аль болох чанартай, чадварлаг уран бүтээл хийх юмсан гэж ажиллаж, хөдөлмөрлөдөг. Бид хэзээ ч зарим хамтлаг дуучид шиг ая хулгайлж дуулаад үгүй гэж гүрийхгүй. Монголдоо гайгүйд тооцогддог хамтлаг, дуучид хулгай хийж бусдын аяыг өөрсдөө зохиосон мэт аяглаж байхыг харахаар их эвгүй юм. Нэг талаараа бусдын юмыг хулгайлж хуулбарласаар байх юм бол монголын урлаг цаашид хөгжихөд их хэцүү шүү дээ” хэмээн ихэд бухимдалтай явдагаа илэрхийлсэн юм.
Олон улсын урлагийн тавцанд хүчээ сорьж нэрээ хүртэл өөрчилсөн тус хамтлагийн хувьд уран бүтээлээ хэсэг завсарлан нам жим байсан ч тун удахгүй уран бүтээлийн ажилдаа орох төлөвлөгөөтэй байгаагаа тус нэвтрүүлгийн үеэр фэнүүддээ дуулгаад авна лээ.
