“Оддын бэсрэг наадам” өнгөтэй сайхан боллоо

ТВ5 телевизийн уран бүтээлчид жил бүр “Оддын бэсрэг наадам” цэнгээнт нэвтрүүлгийг баяр наадмын өдрүүдэд зориулан үзэгч түмэндээ өргөн барьдаг билээ. Харин энэ жилийн 8 дахь удаагийн бэсрэг наадмаа ТВ-ийнхээ 10 жилийн ойд зориулан бүтээснээрээ онцлог боллоо. Хамтлаг, дуучид, жүжигчид гээд урлагийн тогоонд чанагдаж яваа үе үеийн уран бүтээлчдийн төлөөллийг оролцуулж, жинхэнэ Монгол наадмын ёс журмын дагуу бэсрэгхэн наадам зохион байгуулдаг уламжлалын дагуу энэ жилийн наадам тун ч өргөн дэлгэр сайхан болж өнгөрсөн. Манай нэвтрүүлгийн энэ удаагийн дугаарт хошин шогийн “Шинэ үе” продакшн, “Мөрөөдлийн театр”, “Outlaw” “Sync” хамтлаг, дуучин П.Идэржавхлан, Д.Намсрайноров, Батсайхан, Баянжаргал, Болормаа, Эрдэнэцэцэг, Энхзул, Отгонгэрэл, Мөнхсоёл, Соко зэрэг уран бүтээлчид оролцож наадамчин олныг баясгалаа. ТВ5 телевизийн 10 жилийн ойд зориулсан “Оддын бэсрэг наадам”-ын хүчит бөхийн барилдаанд дуучин Д.Намсрайноров гуравдахь удаагаа түрүү бөхөөр тодорсон. Харин сур харваанд Мөрөөдлийн  театрын жүжигчин Алтаншагай, хурдан морины уралдаанд Outlaw хамтлагийн дуучин Ариукагийн унасан халиун алаг морь түрүүлсэн. Наадамд оролцсон уран бүтээлчид наадамчин олондоо өөрсдийн уран бүтээлийн дээжээс толилуулж, мөн наадмын партиг тун ч доргио хийж, нэг үдшийг хөгжилтэй өнгөрөөсан. Энэ жилийн наадамд Outlaw хамтлагийн дуучин Чинзо хамгийн идэвх санаачлагатай байж эрийн гурван наадамд гурвууланд нь хүч сорисон болов ч жаахан бүтэлгүйтсэн. Хүчит бөхийн барилдаанд гутал нь халтирснаас болж өвдөг шороодсон бол сур харваанд мөн л аз дутаж сум байндаа оноогүй. Харин хурдан морины уралдаанд түүний унаж хурдлуулсан хурдан ажнай баян ходоодод давхисан. Хэдий тийм ч эгдүүтэй, хүүхэд шиг зантай Чинзо урам хугаралгүй эрийн гурван наадмыг чимж, улам ч сонирхолтой, хөгжилтэй болгож чадсан. Дуутай хууртай, хурдтай, мэргэнтэй, хүчтэй дэнж хотойтол сайхан наадсан “Оддын бэсрэг наадам”-ыг www.tv5.mn сайтаас бүрэн эхээр нь үзэх боломжтой.