Мөнгөний нийлүүлэлтийн зургадугаар сарын байдлаарх мэдээллийг Монголбанкнаас гаргажээ.
Нөөц мөнгө өмнөх сарынхаас 25.0 хувь, өмнөх оны мөн үеэс 81.1 хувиар өсч 2281.4 тэрбум төгрөгт хүрэв. Тус сард Төв банкин дахь харилцах, хадгаламж өмнөх сараас 33.3 хувь буюу 347.4 тэрбум төгрөг, банкнаас гадуурх мөнгө 11.3 хувь буюу 67.3 тэрбум төгрөг, банкуудын касс 22.3 хувь буюу 41.3 тэрбум төгрөгөөр тус тус өсчээ.
Банкуудын Төв банкин дахь харилцах, хадгаламжийн нөөц мөнгөнд эзлэх хувь өмнөх оны мөн үеэс 11.6 нэгж хувиар нэмэгдэж 61.0 хувь болсон бол банкуудын кассын эзлэх хувь 2.6 нэгж хувиар буурч 9.9 хувь, банкнаас гадуурх мөнгөнийх 9.0 нэгж хувиар буурч 29.1 хувь болсон байна.
Mөнгөний нийлүүлэлт өмнөх сараас 4.8 хувь, өмнөх оны мөн үеэс 22.2 хувиар өсч 7051.2 тэрбум төгрөгт хүрэв. Мөнгөний нийлүүлэлтийн жилийн өсөлт өмнөх сарынхаас 1.8 нэгж хувь, өнгөрсөн оны мөн үеэс 41.7 нэгж хувиар буурчээ.
Мөн сард банкнаас гадуурх мөнгөний нийлүүлэлтийн жилийн өсөлтийн хурд өмнөх сарынхаас 13.8 нэгж хувь, валютын хадгаламжийнх 10.0 нэгж хувь, валютын харилцахынх 3.2 нэгж хувиар тус тус өсч, харин төгрөгийн хадгаламжийнх 3.7 нэгж хувь, төгрөгийн харилцахынх 15.7 нэгж хувиар тус тус буурчээ.
2012 оны 6 дугаар сарын мөнгөний үзүүлэлтүүдийн өөрчлөлтийг үлдэгдлээр нь авч үзвэл валютын харилцах өмнөх сараас 123.1 тэрбум төгрөг, валютын хадгаламж 87.0 тэрбум төгрөг, банкнаас гадуурх мөнгө 67.3 тэрбум төгрөг, төгрөгийн хадгаламж 55.7 тэрбум төгрөгөөр тус тус өсч, харин төгрөгийн харилцах 11.5 тэрбум төгрөгөөр буурчээ.
М2 мөнгөний жилийн өсөлтийн 41.0 хувийг төгрөгийн хадгаламж, 34.2 хувийг гадаад валютын хадгаламж, 14.3 хувийг банкнаас гадуурх мөнгө, 5.7 хувийг валютын харилцах, 4.8 хувийг төгрөгийн харилцах тус тус бүрдүүлжээ.
Гадаад хадгаламжийн мөнгөний нийлүүлэлтийн жилийн өсөлтөд үзүүлэх нөлөө 2012 оны 3 дугаар сараас хойш мэдэгдэхүйц нэмэгджээ.
