Хоёр өдрийн турш хотын стрессээс хол, задгай агаарт хөгжим сонирхогч залуусыг “амьд” хөгжмөөр цэнэглэх “Playtime 2012” рок наадам энэ жилийнхээ сүлд дууг тодрууллаа. Тэгэхээр наадмын үеэр хамтлаг, дуучдын тоглолт, төрөл бүрийн арга хэмжээний сул зогсолт бүрийд цаана дэвсгэр дуу буюу сүлд дуугаар “Dutch Uncles” хамтлагийн “Cadenza” хэмээх уран бүтээл нүргэлэх нь.
Наадам ирэх сарын 4, 5-нд Гачууртын “Монгол шилтгээн”-д болох бөгөөд оролцох хамтлагуудыг өнөөдрийг хүртэл бүртгэхээр болсон юм. Өөр нэг шинэхэн мэдээллийг дуулгахад, энэ жилийн наадамд ямар хамтлагууд оролцохыг тэсч ядан хүлээж байгаа бол маргааш асуултандаа хариултаа авч болох нь. Маргааш хамтлагуудыг шалгаруулах тоглолт 17.00 цагт C1 телевизийн студид болох юм. Харин наадмын зочин хамтлагаар Японы “Taffy” хамтлаг ирэхээр болсон билээ. Өмнөх жилүүдэд ОХУ-ын болон Английн хамтлагууд зочноор ирж байсан юм.
Тасалбарын тухайд, дан хоёр дахь өдрийн тоглолтыг үзэх нь 15 мянган төгрөг, хоёр өдрийнх нь 20 мянган төгрөг, таван хүн хоёр өдрийнхийг 80 мянган төгрөгний багцаар, арван хүн хоёр өдрөөр бол 150 мянган төгрөгний тус тус багцаар үзэх боломжтой юм байна. Худалдаанд гармагцаа “шуураад” дуусдаг тасалбар нь удалгүй зарагдаж эхлэх гэнэ.
Сонирхуулахад, өмнөх жилүүдийн сүлд дууг явмагц “Playtime” –ыг санадаг гэсэн хөгжим сонирхогчдын дурдатгал байдаг билээ.
