Скарлетт хамгийн анх 2003 онд “Орчуулгын алдаа” киноны гол дүрийг бүтээжээ. Энэ кино хүмүүсийн сэтгэлд нийцэж, гол дүрд нь тоглосон царайлаг жүжигчний талаар ярьж эхэлсэн юм. Үүний дараа “Болейний бас нэг төрөл”, “Вики Кристина Барселона” зэрэг олон кинонд тоглосон билээ.
Харин саяхан тэрбээр “Төмөр хүн”, “Өшөө авагчид” хэмээх супер баатруудын тухай кинонд Хар бэлэвсэн эм хочит Наташа Романовагийн дүрийг бүтээжээ.
Скарлетт Йоханссон саяхан Орост ирээд энэ орны тухай, мөн өөрийн сул тал, ямар хайртай учрахыг хүсдэгээ ярьсан байна.
-Орост айлчилсан дурсамжаасаа хуваалцаач?
-Би Марк Руффало, Крис Хенсворт, Том Хиддлстон, Жереми Реннер, Роберт Дауни нартай олон хот, улсаар аялж байсан. Гэхдээ Орос орон биднийг халуун дотноор хүлээн авснаар сэтгэлд үлджээ. Үүнд би үнэхээр их догдолсон. Дээрээс нь орос хүмүүсийн эрч хүч надад хүнийрхүү санагддаггүй. Энэ нь миний слав гаралтай холбоотой байж магадгүй.
Миний ээж белорусь гаралтай хүн. Тиймээс би слав төрхтэй. Бас слав сэтгэл зүрхтэй.
-Слав гаралтай, америк иргэншилтэй юм байж. Гэхдээ ирланд овогтой юм байна шүү дээ?
-Үгүй ээ, дани овогтой. Миний аав дани гаралтай хүн. Эмээ маань Данийн алдарт зохиолч, найруулагч, кино зохиолч Айнер Байнкамп Йоханссон шүү дээ. Аав маань АНУ руу цагаачилж, архитектор мэргэжилтэй болоод ээжтэй минь танилцсан гэдэг. Тэд дараа нь салсан л даа. Энэ нь надад маш хүнд цохилт болсон.
Ээж минь энэ хүнд үеийг хэрхэн даван туулсныг одоо ч төсөөлж чаддаггүй. Яагаад гэвэл тэр надаас гадна миний ихэр дүү Хантер, эгч Ванесса, ах Эдриан гээд дөрвөн хүүхдээ өсгөсөн хүн. Зовлон бэрхшээл түүнийг хатуужуулсан. Тэр үргэлж л “Хэрвээ чи энэ амьдралд хэн нэгэн байхыг хүсвэл өгзгөө өргөөд зорьсондоо хүр” хэмээн хэлдэг. Би ээж шигээ хүчирхэг эмэгтэй биш ч түүнээс олон зүйл сурсан. Ялангуяа сэтгэл гутралаас өөрийгөө яаж авч гарахаа мэддэг болсон.
-Гэхдээ та сэтгэл гутралд амархан оромтгой шүү дээ?
-Тийм ээ. Хэн нэгнээс салсныхаа дараа би байнга л сэтгэлээр уначихдаг. Гэхдээ бодит байдлаас холдохгүйн тулд түр зогсохыг хичээдэг. Чин үнэнийг хэлэхэд би хачин зантай хүн.
Та нар ч харж байгаа байх. Би чинь хүүхэд асрагч, оюутан, супер эмэгтэй гээд л эсрэг тэсрэг дүрд тоглодог шүү дээ. Энэ нь ч надад таалагддаг юм.
Сонирхуулахад ээж маань миний сонголтыг үргэлж дэмждэг. Тэр миний менежер. Бид одоо хамтран ажиллаж байгаа.
-Скарлетт, та үнэхээр өөртөө тийм шүүмжлэлтэй ханддаг юм уу. Эсвэл маягладаг юм уу?
-Би хумсаа мэрдэг, өгзгөндөө целлюлиттэй, буруу хооллодог, 163 см өндөр, арчаагүй гэж хэлэхдээ огт маягладаггүй. Энэ бол үнэн. Хэдий тааламжтай биш ч байхгүйгээ байгаа юм шиг царайлах нь тэнэг хэрэг. Би өөртөө шударга байгаад заншчихсан.
Харин гэрэл зурагчны дурангийн өмнө маяглах нь зүйн хэрэг. Гэхдээ байгаагаараа зургаа авахуулахын тулд хэтрүүлэх хэрэггүй. Ер нь бүх зүйлд өөрийнхөөрөө байх, түүн дээрээ аль болох аятайхан байхыг хичээх нь хамгийн чухал юм. Гагцхүү өөрийн дутагдлыг мэдсэн хүн л хөгжиж чаддаг.
-Киноны дүрээсээ ч бас өө сэв хайж байж сонгодог уу?
-Үнэндээ би бусад жүжигчний адил сонирхолтой, нэгэн хэвийн бус дүрийг сонирхдог. Би сахиус, эсвэл цус сорогчийн дүрд амархан хувирч чадна л даа. Гэхдээ хүний дүр төрхийг эсрэг талын баатраар гаргах нь илүү сонирхолтой. Жишээбэл Наташа Романофф бол миний хувьд маш сонирхолтой дүр. Гэхдээ би өөрийгөө ялан дийлэхийн тулд боломжоо хэтрүүлж тоглох дуртай. Надад ийм дүр олон ирдэг гэж хэлж чадахгүй, өөрөө л санаачилга гаргадаг. Ер нь үзэгчид намайг хүчирхэг тэмцэгчийн дүрээр дахиж харахгүй гэдэгт итгэлтэй байна.
-“Өшөө авагчид” киноны үеэр өөрийгөө даван туулах хэрэг гарсан уу. Эсвэл бүх зүйл амар хялбар байсан уу?
-Өө, энэ киноны дүрд тоглохын тулд, тэр усны хувцсанд нь багтахын тулд маш ихээр турах хэрэг гарсан. (Инээв). Анх тэр хувцсыг хараад цочирдож билээ. Тэгээд “Бурхан минь. Ийм целлюлиттэй хүн үүнд багтана гэж үү” хэмээн өөртөө хэлсэн удаатай.
-Хоолоо сойсон уу?
-Тэгсэн. Гурилан бүтээгдэхүүн, амттан, мөхөөлдөснөөс татгалзсан. Аль болох бага хооллож, нэг дор их идэхгүйг хичээсэн. Мэдээж спортоор маш их хичээллэсэн. Баатрынхаа хувцастай аятайхан харагдахын тулд олон өдөр, шөнө зүтгэсэн. Тэгээд ч хүссэндээ хүрсэн. Би өөрөөрөө бахархаж байна.
-Зугаа цэнгэлээ ч бас багасгасан байх?
-Би өөрийгөө тийм их зугаа цэнгээн хөөсөн амьтан гэж бодохгүй байна. Сургуульд, чөлөөт цаг ихтэй байхдаа л тийм байсан. Ялангуяа ахлах ангид байхдаа найзуудтайгаа байнга шөнийн цэнгээний газар ордог байж билээ. Харин одоо бол ажил, зугаа цэнгэл гэсэн хоёр сонголтын эхнийхийг сонгоно. Бас клубээр явж зугаацалгүй, найзуудтайгаа допинг, архи тамхи, мансууруулах бодис хэрэглэлгүй, зүгээр л сайхан ярьж суухыг илүүд үзнэ.
Мөн амьдралд ямар нэгэн юм хийж, байр сууриа олох зорилготой хүмүүстэй уулзахыг хичээдэг. Тухайлбал, би найз Пит Йорнтойгоо “Break up” дууг мэргэжлийн тоног төхөөрөмж дээр бичүүлсэн. Энэ бүхэн нөхөрлөлдөө үнэнч ханддаг, сайн найз байхыг хичээдгийн илэрхийлэл болов уу.
-Та цаашид дуулах уу?
-Дуулна гэж бодож байна. Хөгжим, киног хослуулна. Гэхдээ жүжигчний ажлаа нэгдүгээрт тавина. Би эргэн тойрныхонтойгоо өөрийн бодол санааг хуваалцахыг хүсч байна. Харин жүжигчний мэргэжил бол дүрийнхээ хүрээнд хязгаарлагдан, ийм боломжийг олгодоггүй ээ.
-Яг одоо та юу мөрөөдөж байна?
-Агуу их хайрыг. Хэзээ нэгэн цагт миний ханхүү намайг олоод, бүх зүйл сайхан болно гэдэгт би чин сэтгэлээсээ итгэдэг. Гэнэн тэнэг, инээдтэй санагдаж болох л юм. Мөрөөдөл болгон биелдэггүйг би мэднэ. Хэрвээ хүүхэд байхдаа хүсч байсан шигээ их сургуульд орж, археологич, эсвэл эмч болсон бол жүжигчин болохгүй байсан. Харин одоо би нас биед хүрсэн болохоор жүжиглэнэ гэдэг миний хувь тавилан гэдгийг ойлгосон.
-Та шүтлэгтэй юу?
-Би дээд хүчинд итгэдэг. Гэхдээ ямар нэгэн тодорхой шашин шүтдэггүй. Магадгүй яваандаа өөрийн замаа сонгож, ямар нэгэн шашинд итгэдэг болох ч юм билүү. Одоохондоо би Христийн зул сарын баяр, еврейн Хануки баярын аль алиныг нь баяртайгаар угтдаг хэвээр байгаа.
Эх сурвалж: "Өглөөний сонин"
