“Twilight”-ынхан “Teen choice awards”-ын шагналыг түүв

 “Teen Choice Awards” шагнал гардуулах ёслол 14 дэх жилдээ боллоо. Өнгөрсөн ням гаригт болсон уг ёслолд шинэ залуу оддоос гадна шоу ертөнцийн томчууд ч хүрэлцэн иржээ.

2012 “Teen Choice Awards”-ын гол шагналуудыг “The Twilight Saga: Breaking Dawn- Part 1.” киноны уран бүтээлчид түүжээ. Тэд нийт 11 номинацид тэргүүлсэн аж. Уг киноны гол дүрийн жүжигчин болох Кристен Стюварт, Тейлор Лотнер, Роберт Паттинсон нар шилдгийн шилдэг “Серфингийн самбар”- ын эзэд болжээ. Үзэгчдийг байлдан дагуулж байгаа “Snowwhite and the Huntsman” киноны Цасангоогийн дүрийг бүтээсэн авьяаслаг залуу жүжигчин Кристен Стюварт гурван ч шагнал хүртсэн байна.

Түүнчлэн дуучин Жастин Бибер, “The Vampire Diaries”, “The Hunger Games” киноны уран бүтээлчид тус бүр найман шаг налын эзэн болжээ. Үүний араас дуучин Тейлор Свифт таван шагнал хамж, удаалсан байна. Хөгжим, кино, телевиз, спорт, загвар, хошин урлаг болон онлайн ертөнцөд амжилт гаргасан оддыг 13-19 насныхны үнэлэлт дүгнэлтээр шалгаруулж, серфингийн самбар хэлбэртэй цомоор шагнадаг “Teen Choice Awards”-ыг анх 2008 онд зохион байгуулж байсан түүхтэй. Харин өдгөө уг арга хэмжээний цар хүрээ улам тэлж, энэ оны шалгаруулалтад өсвөр насны 134 сая залуу оролцож, саналаа өгсөн байна.

Дашрамд дуулгахад, энэ үдэш Жастин Биберийн найз охин, залуу дуучин, авьяаслаг загвар зохион бүтээгч Селина Гомезийн 20 насны төрсөн өдөр тохиожээ. Түүнийг шагналаа авахаар тайзан дээр гарч ирэхэд нь найз хөвгүүн нь төрсөн өдрийн бялуу “илгээж”, бэлэг барьсан байна.

 Б.ДУЛАМ