Бодибилдингийн домогт тамирчин, кино урлагийн од, улстөрч, бизнесмэн Арнольд Шварценеггерийн 65 насны ой өчигдөр тохиожээ. Австрийн 2000 хүн амтай Таль-Грац тосгонд төрсөн тэрбээр таван жилийн өмнө нутагтаа 60 насныхаа ойг тэмдэглэсэн гэдэг. Тухайн үед австричүүд түүнд зориулж амьдад нь хөшөө босгох санал дэвшүүлж байжээ. Харин А.Шварцнеггер уг саналаас татгалзсан бөгөөд төрсөн нутагт нь байгуулсан хувийн музей байхад л хангалттай гэжээ. Эцгийнхээ зөвлөсний дагуу тэрээр бага насандаа хөлбөмбөгөөр хичээллэж байв. Харин 14 насандаа бодибилдингийн тамирчин болохоор эргэлт буцалтгүй шийдсэн гэдэг. Түүний үлгэр дуурайл болж байсан тамирчид бол нэрт бодибилдингийн тамирчин Рег Парк, Стив Ривз болон усанд сэлэлтийн домогт тамирчин Жони Вайсмюллер нар аж. Хожмоо "Төмөр Арни" буюу А.Шварценеггер "Олимпийн мистер", "Ертөнцийн мистер" зэрэг титмийн эзэн болж байжээ. 1970-аад оноос А.Шварценеггер "Терминатор", "Араатан" зэрэг олон бүтээлээрээ олны танил болж, 2003 онд кино урлагийн түүхэнд хамгийн өндөр цалинтай жүжигчин болж байжээ. "Терминатор-3" кинонд тоглож, хөлсөнд нь 30 сая ам.доллар авснаар тухайн үедээ хамгийн өндөр үнэтэй жүжигчнээр тодорч байв. Үүний дараахан тэрээр улс төрд хүч үзэхээр Холливудыг орхисон юм. Калифорни мужийн амбан захирагчийн сонгуульд ялсан тэрээр хоёр ч удаа уг албыг хашсан. Харин амбан захирагчийн албаа өгсний дараа кино урлагийн ертөнцөд дахин хөл тавих болжээ. 2013 онд А.Шварценеггерийн тоглосон "Сүүлчийн тулаан" кино дэлгэцнээ гарах гэнэ. Мөн тэрээр ирэх жил "Терманатор-5"-д тоглохоор төлөвлөөд байна.
Д.ЦЭРЭНДОЛГОР
