Өнгөрсөн зууны хамгийн гоо үзэсгэлэнтэй бүсгүйчүүдийн нэг Мэрилин Монро 1962 оны наймдугаар сарын 5-нд нас барсан юм.
Түүний нас барсан өдөртэй холбогдуулан Вашингтоны “Смитсониан” музейд нэрт жүжигчинтэй холбоотой эд зүйлсийн үзэсгэлэн гарсан байна. Тухайлбал, Каннын 65 дахь удаагийн наадмын сурталчилгааны самбар дахь Мэрилин Монрогийн гэрэл зураг бий аж.
Үзэсгэлэнгийн зохион байгуулагч AFP-д өгсөн ярилцлагадаа “Мэрилин Монрог ид мандаж байсан 1950-иад оны үеийн эд хэрэглэл үзэсгэлэнгийн үзмэр болж байна. Эдгээр нь жүжигчин эмэгтэйтэй ямар нэг байдлаар холбоотой юм. Кино, сурталчилгаа, кино наадмуудад оролцохдоо өмсөж байсан хувцас, жижиг гоёл чимэглэл, ховор гэрэл зураг багтсан” гэжээ.
Холливудын музейг үндэслэгч Донелли Дадиган “Мэрилин Монро бейсболын тамирчин Ди Мажиотой л хамгийн аз жаргалтай байсанд хүмүүс итгэлтэй байдаг. Тиймээс бид хосуудтай холбоотой эд хэрэглэлийг үзэсгэлэнд тавихаар шийдсэн. Үзэсгэлэн 35 жилийн гайхалтай түүхийг харуулсан” гэв.
1999 оны аравдугаар сард Нью-Йоркийн “Кристин” дуудлага худалдааны төвд Мэрилин Монротой холбоотой эд зүйлсийг дуудлага худалдаагаар оруулсан юм. Хоёр өдөр үргэлжилсэн худалдаагаар нийт 13.4 сая ам.долларын эд зүйлс борлогджээ.
Мэрилин Монро 1962 оны наймдугаар сарын 5-нд 36 насандаа таалал төгссөн юм. Түүний нас барсан шалтгааныг нойрны эмийн тунг хэтрүүлэн хэрэглэснээс болсон гэж хууль сахиулагчид тайлбарлажээ. Гэвч хэвлэлүүд энэ тухай мэдээлэхээс гадна нэрт жүжигчнийг амиа хорлосон, Ерөнхийлөгч Жонн Кеннедитэй холбоотой байсан учраас бусдад хорлогдсон хэмээн тайлбарлажээ.
Т.Арьяа
