Швейцарийн нэгэн хөгжимчин галт тэргээр зорчиж явахдаа нэрт урлаач Страдиваригийн бүтээсэн 2.5 сая долларын үнэтэй хийл хөгжмийг мартаж буужээ. Энэ үнэлж баршгүй ховор хөгжмийн зэмсгийг дөрвөн хоногийн дараа сайн санаат нэгэн хүн гээгдсэн зүйлийг олж аваачдаг товчоонд өгсөн байна. Салан хөгжимчин XVIII зууны нэрт хөгжмийн зэмсэг урлаач Антонио Страдиваригийн бүтээсэн хийл хөгжмийг Швейцарийн Бьен хотоос Тул руу зорчиж явсан хот хоорондын галт тэргэнд мартаж орхисон аж. Хийл хөгжмийн эзэн түүнд зэмсгээ хэд хоногийн хугацаатай зээлдүүлсэн байна. Хөгжимчин эр хэд хоног тоглолт хийхдээ түүнийг нь хэрэглэхээр болжээ. Гэвч танил нь ховор хийлийг нь алдаж орхив.
Хайнга эр Берн хотын галт тэрэгний буудал дээр хөл тавиад хийл хөгжмөө мартсан гэдгээ сая л нэг юм санажээ. Тэрбээр сандрахдаа цагдаагийн хэсэг дээр очсон байна. Галт тэрэгний үйлчлэгчид хийл хөгжмийг эрж хайн цувааг сайтар нэгжсэн боловч юу ч олж илрүүлсэнгүй. Хяналтын камерийн бичлэгийг үзсэнээр хөгжмийн зэмсгийг нэгэн үл мэдэгдэх этгээд авч явсныг тогтоожээ. Ховор хийцийн хийл хөгжмийг дөрөв хоногийн дараа Берн хотын төмөр замын буудлын олсон, гээсэн эд зүйлс тушаадаг товчоонд аваачиж өгсөн байна. Удалгүй тэр хөгжмийн зэмсэг хууль ёсны эзэндээ очсон аж. Өдгөө дэлхий дээр Страдиваригийн урласан 650 орчим хийл хөгжим байдаг билээ. Эдгээр чавхдаст хөгжмүүдийн дундаж үнэ 2.5 сая доллар байдаг юм. 2011 оны зургаадугаар сарын 21-нд болсон дуудлага худалдаагаар Страдиваригийн бүтээсэн нэгэн хийл хөгжим 16 сая долларын үнэ хүрчээ.
