Монголын хамгийн том амьд хөгжмийн “Play time” өнгөрсөн амралтын хоёр өдөр болж өнгөрлөө. Жил ирэх бүр үзэгч болон хамтлаг нь улам бүр нэмэгдсээр байгаа тус наадамд энэ удаа 13 шинэ залуу уран бүтээлчид, өмнө оролцож байсан 37 хамтлаг оролцсон юм.
Монгол шилтгээний хашааны голд тоглолтын тайз байрлуулж эргэн тойронд нь худалдаа үйлчилгээний цэгүүдийг байрлуулжээ. Дотор нь эмнэлэг, хамгаалалтын алба ажиллаж байснаас гадна хөгжмийн наадмыг зохион байгуулах талбайн ойролцоо зөөврийн 14 ширхэг ариун цэврийн өрөө тавьсан байв. Хашаан дотор түргэн хоол, хуушуур , бууз, пиво, хувцас зарах цэгүүд, ажилласан юм.
“Play time” интертаймент нэрийн дор бүжиг заах, биен дээр зураг зурах, хөлбөмбөг волейболын тэмцээн зэрэг арга хэмжээнүүдийг өдрийн турш зохион байгуулав. Түүнчлэн энэ үеэр Фотомессенжер, Фейсбүүк группийн залуус өөрсдийн авсан гэрэд зургуудаар үзэсгэлэн гаргасан байлаа.
Хамгаалалтын ажилтнууд гаднаас орж ирэгсдийн цүнх, майхны уутанд нэгжлэг хийж согтууруулах ундаа, хутга болон хурц иртэй зүйл, нэг төрлийн олон тооны зүйл зэргийг “Гарахад нь буцаж өгнө” хэмээгээд хурааж авч байв. Амарч, амьд хөгжим сонсож стрессээ тайлахаар хүүхдүүдээ дагуулсан залуу гэр бүлүүд, найз нөхөд, хамт олноороо ирсэн хүмүүс олон байсан ч архи уух, мансуурах гэсэн нөхдүүд ч нэлээд иржээ. Үүдэнд архи, хутга, зүү тариур ч хураасан харагдана. Хамгаалалтын ажилтнууд “Хураасан архи дарс нэг суудлын машин дүүрэн боллоо. Мансууруулах бодисыг нь хаанаа хийснийг нь хайгаад олсонгүй” гээд хураасан зүү тариуруудыг харуулж байв. Хэдий нэгжиж оруулж байгаа ч хүмүүс архийг майнхныхаа уутанд болон биедээ нууж аль эсвэл цэвэр усны саванд хийх зэргээр оруулсан харагдана.
Хамтлаг дуучид
Шинэ залуу хамтлагууд өдрийн турш ээлжээр тайзан дээр гарч уран бүтээлээ толилуулж байв. Харин олны танил хамтдлагууд нь нар жаргасны дараагаас л тайзан дээр гарч уран бүтээлээ толилуулсан юм. Тэнд цугласан хүмүүс “The Electrics”, “Ruler’s” зэрэг хамтлагуудыг сайн юм гэж магтацгааж байв. Энэ үеэр мэдээж өнөөх уригдаж ирсэн Японы “Taffy” хамтлаг өөрсдийн тоглолтоо сонирхуулсан.
