МУГЖ Т.Ариунааг хамгийн бат бөхийн гэр бүлийн эзэгтэй гэдэг. Тэрбээр өөрөө ч “…надад гэр бүлийн ямар нэгэн асуудал байхгүй. Би маш азтай эмэгтэй” хэмээн зарлан тунхаглах дуртай. Түүний нөхөр Г.Буяндорж архи, хүүхний асуудлаар олны хэл аманд нэлээд өртөж байсан ч дууч бүсгүй маань нөхрийгөө дээд зэргээр “хамгаалдаг”. Эр нөхрийнхөө эсрэг мэдээлэлд үргэлж хатуу хариулт өгдөг тэрбээр ханьдаа халамжтай, хадамдаа элэгтэй нэгэн байхыг тун ч их хичээдэг бололтой. Тэрбээр саяханаас төлбөр мөнгө болоод тав тухтай байдлаараа монголдоо тэргүүлдэг гэх “Ачтан элит” эмнэлэгээр өдөр бүр эргэлдэх болжээ. Учир нь түүний хадам ээж тус эмнэлэгт эмчлүүлж байгаа аж. Тиймээс гавъяат маань өөрийн ажлыг хойш тавьж өдөр бүр хадам ээжийгээ халамжлаад байгаа бөгөөд дотрын тасгийн эмч сувилагчдын гарыг цайлгаж, “Энд манай ээж хэвтэж байгаа юм” гэж ирээд л халамжтай бэр болохоо гайхуулаад байгаа гэнэ лээ. Ирэх бүртээ дөрөв таван тор дүүрэн идэж, уух юм барьсаар инээд алдан орж ирдэг түүнийг эмнэлэгийн ажилчдаас гаднаа өвчтөнүүд ч “бишрээд” байгаа гэдэг шүү.
Г.Мөрөн
