“Алтан хальс” кино холбоо, Үндэсний соёл, амралтын хүрээлэн хамтран “Open Air” задгай кино театр байгуулж, долоо хоног бүр кино гаргаж байгаа тухай бид өмнө нь мэдээлсэн. Тэгвэл өнөөдөр найруулагч Ричард Линклэйтерийн 2001 оны бүтээл “Сэрүүн анир”-ыг гаргахаар болжээ. Уран зөгнөлт жанрын энэхүү киноны гол дүрд Уайли Уггинс, Итан Хоук, Жюли Дельпи нар дуу оруулжээ.
Киног видео маягаар бичээд дараа нь ротоскоп аргаар хүүхэлдэйн киноны хэлбэрт хувиргажээ. Хүүхэлдэйн киноны хэв маяг нь киноны үйл явдал, өрнөл, цаад утга санаатай нь нягт зохицсон бөгөөд энгийн кино асан бол ихэнхи үзэгчдэд хүчтэй ойлголт өгөх, мэдрэмж төрүүлж мэдэхээргүй байж болох байв. Киноны гүн ухаан нь цаг хугацаа, он жил улиран одох явдал нь маргаангүй бидний амьдралыг тодорхойлох бөгөөд энэхүү чухал мэдэгдэхүүнийг үл хайхрах нь үнэнээс нүүр буруулж буй хэрэг байх учиртай.
Г.Хэрлэн
