Дуучин ВХ залуусыг байлдан дагуулсан 20 гаруй хит дуутай. Түүний уран санд залуусын хүсэл эрмэлзэл, маргаашдаа итгэх итгэлийг хөглөсөн, тэдэнд урам зориг хайрласан олон сайхан уран бүтээл байдаг. “My love”, “Sorrow” дууг сонсоод хайраа санадаггүй хүн гэж байхгүй байх. Эгшиглэнтэй хамтарсан “Love song”, “100 хувь” дуунуудыг даган дуулдаг бардам охидыг олох тийм ч хэцүү биш.
“Ийм нэгэн дурлал”, “Луйврын хот” зэрэг киноны дууг сонсоогүй хүн ховор. Icetop хамтлагтай хамтарсан “Саак”, “Гараа өргө” дуунууд залууст ирээдүйдээ итгэх итгэлийг өгч байдаг. Энэ бүх дуунууд 2 сарын 2-нд УБ Паласт эгшиглэх гэж байна. ВХ эдгээр дуунуудын шүлгийг бичихдээ өөрийн ертөнц, өөрийн мэдрэмжээр туурвидаг байна. “Аяа сонсдог. Аяараа хөглөгдөж шүлэг бичдэг” хэмээн тэрээр даруухан өгүүлсэн байна лээ. Сэтгэлээс гардаг учир түүний дуунууд залуусын аялах, сонсох дуртай, тэдний зүрх сэтгэлд хүрсэн хит дуу болдог болж таарах нь. Тэрээр хэдхэн хоногийн өмнө 2-нд хийх тоглолтынхоо нэрээр нэрлэгдсэн “Зөв бай” цомгийнхоо “Who is BX” дуугаа цацжээ. Энэ дуугаа аавынхаа гэгээн дурсгалд зориулжээ.
