АНУ-ын NBC телевизээс зохион байгуулж эхэлсэн “Stars Earn Stripes” хэмээх шоуг буруу утга санаа илэрхийлж, нийгэмд муу үлгэр дууриал үзүүлнэ хэмээн Нью-Йоркт өчигдөр олон арван хүн эсэргүүцэж жагсаал зохион байгуулжээ.
Реалити шоуны утга нь оролцогчид цэргийн бэлтгэл сургуулилалт, зэвсэг техниктэй харьцаж, шилдэг дайчид болон бэлтгэгдэх юм. Шоунд нэр алдартай хүмүүс оролцоно. Тухайлбал, Бүгд найрамдах намын экс гишүүн, Сара Палины нөхөр Тодд, жүжигчин Диан Кайн, боксчин Мохаммед Алигийн охин Лайла Али, олимпийн аварга, цаначин Пикабо Стрийт багтжээ. Харин шоуны хөтлөгчөөр АНУ-ын бэлтгэл генерал Уэсли Кларк ажиллах юм.
Эсэргүүцлээ илэрхийлэгчдийн үзэж буйгаар АНУ-ын залуус Афганистан болон зарим улсад цэрэг дайн, энхийг дэмжих ажиллагаанд оролцож байгаа. Гэвч телевизийн ийм шоу зохион байгуулснаар цэрэг армийн албан хаагч болохыг дэмжих, дайныг өөгшүүлэх, хүүхэд багачуудад галт зэвсэг хэрэглэхийг турхирах аж.
“Цэргийнхний гэр бүл” хэмээх төрийн бус байгууллагын гишүүн Сара Фухро AFP-д өгсөн ярилцлагадаа “Миний хүү Ирак, Афганистаны дайнд оролцоод ирсэн. Гэвч түүний бие, сэтгэл зүрх нь дайны хүнд үеэсээ салаагүй байна. Түүнд үлдсэн сэтгэлийн шарх ямар их зовлон, шаналал илэрхийлж буйг би төсөөлж чадахгүй байна” гэжээ.
Мөн тэрбээр “Цэрэг дайны ажиллагааг дэмжсэн реалити шоу хүүхдүүдэд сонирхолтой санагдана. Гэхдээ тэдэнд дайн сонирхолтой гэсэн сэтгэлгээг суулгах муу талтай. Хүүхдүүдийг ирээдүйд цэрэг болж эх орноо хамгаалах бус дайнд оролцож хядлага үйлдэхийг би зөвшөөрөхгүй” гэжээ.
NBC телевизийн “Stars Earn Stripes” шоу өчигдрөөс эхлэн гарч байна. Гэвч эсэргүүцэл нийгмийн сүлжээний сайтуудаар идэвхтэй өрнөсөөр.
Орчуулагч редактор Д.Түвшинтөр
