Жессика Бил Холливудад 18 жил гаруй ажиллаж, дүр төрхөө дэлгэцэнд мөнхөлчихсөн нэгэн. Турьхан энэ бүсгүй шийдэмгий бус зангаараа зартай. Гэхдээ зарим нь өөртөө итгэлгүй, юу хүсээд буйгаа үл мэдэх зан чанарыг их мэдрэмжтэй нь холбон тайлбарладаг. 30 насны босго давж буй тэрээр мөдхөн Жастин Тимберлейктэй гэрлэнэ. Урьдын амрагийн түүх, олон мянган шүтэн бишрэгч бүсгүйчүүдээрээ зартай эрийн гэргий болж, гэр бүлээ амар тайван авч явна гэдэг амаргүй. Ийм эртэй урт удаан хугацааны турш, тогтвортой амьдарна гэдэгт найдаж буйгаа Жессика Бил сүүлд өгсөн нэгэн ярилцлагадаа хэлжээ.
-Жессика, таныг тээнэгэлзэх дуртай, шийдэмгий бус гэж ярих юм. Үнэхээр тийм хүн гэж үү?
-Тийм гэж ойлгож болно оо. Би шийдвэр хурдан гаргаж чаддаггүй юм. Бүр өдөр бүрийн асуудал дээрээ ч бүдэрчих гээд байдаг. Нэг зоогийн газар ороод салат захиалснаа гэнэт өөрчлөөд пицца болгочихно. Гэхдээ энэ миний эмзэг, мэдрэмтгий зантай л холбоотой байх. Гэхдээ би энэ муу зан, айдас хүйдсээ давж гарахыг хичээдэг.
-Та юунаас хамгийн ихээр айдаг вэ?
-Үхэл, хөгшрөлт болон түүнээс үүдэлтэй бүхнээс айдаг. Үрчлээ суух, арьс өнгөө алдах гээд л. Миний хувьд толигор сайхан царай төрх бол эрүүл сайхны бэлгэдэл. Эмээгийнхээ залуугийн зургийг харахад хичнээн сайхан бүсгүй байдаг. Тэгсэн хэрнээ одоо ямар болчихоод буйг нь ажихаар айдас эрхгүй төрдөг. Гүйлтийн зам дээр хөл цуцах, эсвэл нуруу хатгахаар би уйлчихмаар санагддаг. Намайг олон жилийн турш авьяаслаг жүжигчин гэж хүлээж аваагүй. Гэтэл холливудад итгэл, найдлага л гол байдаг. Яагаад ч юм миний амьдрал бусдынх шиг хурдтай нисдэггүй ч аажим аажмаар амжилтад хүрдэг.
-За гунигтай зүйлийн тухай ярихаа больё. Охид бүр үзэсгэлэнтэй, баян ханхүүтэй гэрлэхийг мөрөөддөг. Таны нөхөр болох гэж буй Жастин Тимберлейк яг л тийм эр…
-Би ганц бие, баян хижээл авгай болчихоод сайхан харшдаа гоёмсог ноход, царайлаг манаачтай байна гэж боддогоо ээждээ хэлж, уурыг нь их хүргэдэг байлаа. Жастин бол намайг сэргээж, өдөөж өгдөг сайн залуу. Мөн тэр надаас хавьгүй өндөр мэдрэмжтэй гэдгийг ч хүлээн зөвшөөрнө. Тэр байгалиас заяасан мэдрэмж, чадвар авч төрсөн хүн. Тиймээс хуримын бөгжөө авахдаа хүртэл надтай зөвлөөгүй. Тэр бүгдийг мэдэж буйгаа мэдэрдэг. Өглөө сэрээд би тааралдсан хувцсаа өмсчихөөд гарах гэхээр Жастин толгой сэгсрээд өөр хувцаснууд шидэж өгдөг. Тэгээд түүний л зөв байдаг юм.
-Та түүнд уурладаггүй гэж үү. Та хоёр 2007 онд харилцаагаа тасалснаас хойш мөн ч олон эмэгтэйтэй холбоотой гэсэн мэдээлэл тархсан шүү дээ…
-Би итгэмтгий хүн. Итгэмтгий байх муу байж мэдэх юм. Гэхдээ би өөр байхыг хүсдэггүй. Надад харагдаж, мэдрэгдэхээр муу зүйл болохоос өмнө би түүнд итгэсээр л байх болно. Миний хувьд ойр дотны минь хүмүүс эхэнд тавигддаг. Харин дараа нь би өөрийгөө боддог. Аливаа зүйлд хэтэрхий сүржин хандах хэрэггүй гэдгийг би амьдралаасаа ойлгож авсан. Тэгээд ч хурим юуг ч өөрчлөхгүй, одоогийнх шигээ л байна гэдэгт би итгэдэг. Жастин их хөгжилтэй. Үргэлж л намайг инээлгэж явдаг. Гэтэл би өөрөө их чухал царайтай хүн шүү дээ. Тиймээс энэ зан нь надад маш их таалагддаг. Би эцэг эхийнхээ амьдралыг хараад хосууд бие биендээ үргэлж цаг гаргаж байхын чухлыг олж харсан. Мэдээж, Жастин бид хоёр маш олон кино, төсөл дээр ажилладаг. Гэлээ ч хэн хэндээ үргэлж цаг зав гаргадаг. Хэн хэндээ хамгийн чухал хүмүүс гэдгээ л үргэлж мэдэрч байх их чухал. Зүгээр хайртай, үгүйлж байна гэж хэлэх нэг хэрэг. Харин үгүйлж, хайрлаж буйгаа үргэлж үзүүлж, мэдрүүлж байх өөр хэрэг. Жастиныг бага байхад эцэг, эх нь салчихсан юм билээ. Тиймээс тэр ээжтэйгээ өсч, ээжийнхээ таалсан тэр бүсгүйтэй л хамт байхыг илүүд үздэг.
-Хүүхэд төлөвлөж байна уу?
-Мэдээж, төлөвлөлгүй яахав. Цаг нь ирэхээр хүүхэдтэй болно гэж боддог. Найз бүсгүйчүүд маань "Жессика, хурдан хүүхэдтэй болчих. Тэгээд хамтдаа бүүвэйлье" гэж ятгадаг ч би автдаггүй. Жастин бид хоёр үр удмынхаа талаар сайтар ярилцаж, хүсч байгаа. Хаана өсгөх боломжтой талаар удаан ярилцсан.
-Танд яг одоогоор ямар мөрөөдөл байна вэ?
-Би дээд сургуульд суралцахыг хүсдэг. Лекц, семинар, хичээл гээд энэ бүхнийг би үзэлгүй өдий хүрсэн. Үүгээр би дутаад байх шиг санагддаг. Гэхдээ өмнө минь бүх зам нээлттэй байгаа.
Орчуулсан Р.Гэгээ
