“The Social Network” кинонд Марк Зукербергийн дүрийг бүтээснээрээ олны танил болсон Америкийн жүжигчин Жесси Айзенберг Монголд байгаа эсэх тухай нутгийнх нь хэвлэлүүдэд болон цахим ертөнцөд маргаан дэгдэж байна.
Учир нь Барак Обамаг дэмжигч жүжигчин ерөнхийлөгчийн сонгуулийн сурталчилгааны 90days90reasons.com сайтад Монголын хөдөө нутагт гэрт амьдарч буй тухай бичил эсээ бичжээ. Тус сайтад явуулсан уг эсээндээ тэрбээр “Би одоогоор Монголд аялж, гэрт амьдарч байна. Найзууд маань намайг хамт аялахад ятгасан бөгөөд хэрвээ боломж байсан бол гэрээ, тэр дундаа унтлагын өрөөгөө хэзээ ч орхихгүй байв. Гэхдээ одоогийн тав тухгүй байдал өмнө нь ямар сайхан орчинд байсныг минь мэдрүүлж буй. Хэдийгээр би анх явахдаа дурамжхан байсан ч дэлхийн улс үндэстнүүд хэрхэн амьдардгийг харах туршлага болж байна. Тэгвэл Барак Обама дэлхий ертөнц гэж юу болохыг, хүмүүс яаж амьдардгийг мэднэ” хэмээн бичсэн байна.
Харин Америкийн хэвлэлүүд, цахим ертөнцийнхөн залуу одыг монгол гэрт wi-fi буюу интернэтэд холбогдох боломжтойд итгэхгүй байгаа юм. Түүнчлэн хэд хоногийн өмнө олимпийн хаалтанд оролцсон Жесси ийм хурдан Монгол руу аялж, гэрт амьдарч буйд тэд үнэмшээгүй аж.
