Дорнод аймгийн Хөгжимт жүжгийн театрын шинэ барилга ирэх сард ашиглалтад орно. Тус театрын барилгыг улсын төсвийн хөрөнгөөр барьж байгаа бөгөөд сүүлийн үеийн тоног төхөөрөмжөөр бүрэн хангах юм байна. Уран бүтээлчид нь 600 суудалтай шинэ театртаа тавих уран бүтээлийн бэлтгэлдээ оржээ. Энэ талаар Дорнод аймгийн Хөгжимт театрын дарга Л.Наранхүүгээс тодрууллаа.
-Театрын шинэ байраа хүлээж авсан уу?
-Уг нь өдийд шинэ байрандаа орчихсон байх ёстой ч ашиглалтад орох хугацаа нь бага зэрэг хойшлоод байна. Ирэх сарын 1-нд хүлээж авна.
-Танай театрын хуучин барилга хэдэн оных вэ?
-1948 онд баригдсан, зориулалтын бус барилга шүү дээ. Хуучны барилга болохоор ажиллах орчин нөхцөл муутай, төвөөсөө алслагдсан, ажил явуулахад хүндхэн болоод байсан юм. Харин шинэ барилга маань аймгийн төвдөө, тоног төхөөрөмж нь шинэ. Бид шинэ байрандаа орох өдрөө тэсэж ядан хүлээж байна.
-Шинэ театртай болсных үзэгчдэд шинэ уран бүтээлээр бэлэг барина биз дээ?
-Тэгэлгүй яах вэ. Бид шинэ театртаа Оросын зохиолч Виталий Губаревийн “Ид шидтэн” хүүхдийн жүжиг бэлдчихсэн. Мөн ирэх аравдугаар сард бүрэн хэмжээний тоглолт хийнэ. Бас хуучнаар БСШУЯ, Соёл урлагийн хорооноос зарласан сонгодог бүтээлийн уралдаанд зориулж шинэ бүтээл тавина.
-Сонгодог бүтээлийн уралдаанд ямар бүтээл сойх вэ?
-Ямар бүтээл тавихаа одоохондоо шийдээгүй байна. Ямар найруулагчтай хамтарч ажиллахаа ярилцаж байна. Найруулагчаа сонгож байгаад ямар бүтээл тавихаа шийднэ. Орон нутгийн театрууд дотроос симфони оркестртой ганц театр нь манайх. Энэ нь өөрийн тайзнаа сонгодог бүтээлийн бэлтгэл хийх, тавихад томоохон давуу тал болно.
А.Амина
