Монгол Японы уран бүтээлчид хамтран “Багшаа ….Монгол залуусын бэйсболын тэмдэглэл” нэртэй уран сайхны кино хийж байгаа билээ. Тус киноны гол дүрийг бүтээж буй залуу жүжигчин М.Мөнхчимэгтэй хэдэн хором ярилцлаа.
-Сайн байна уу? Манай уншигчдад өөрийгөө танилцуулахгүй юу?
-Сайн байцгаана уу? Намайг Мөнхчимэг гэдэг. СУИС-ийн жүжигчний мэргэжлээр төгссөн.
-“Багшаа ….Монгол залуусын бэйсболын тэмдэглэл” кинонд бүтээж буй дүрийнхээ талаар сонирхуулаач?
– Дүрийн маань нэрийг Солонго гэдэг. Миний бүтээж буй дүр нь бодит амьдралаас урган гарсан бөгөөд жинхэнэ дүрийн маань эзэн Солонго киноны туршид бидэнд тусалж байсан нь дүрээ бүтээхэд их дөхөм болсон. Кинонд 20-24 нас хүртэлх дөрвөн жилийн амьдралыг харуулна.
– Өөрийн чинь хувьд дүрээ бүтээхэд юун дээр илүү их анхаарч байгаа вэ?
-Мэдээж 4 жилийн хугацаа гэдэг бол бага хугацаа биш. Тиймээс нүүр хувиргалт, тухайн хүний сэтгэл зүйн онцлогийг гаргах гээд анхаарах зүйл олон байгаа. Хамгийн гол нь дүрээ сайн бүтээхийн тулд жүжиглэлтэн дээрээ л их анхаарч байна даа.
– Жүжигчинтэйгээ бүтээж буй дүр нь аль нэг талаараа ойролцоо байх юм бол дүрээ мэдрэхэд их тус дөхөм болдог юм шиг санагддаг. Таны хувьд бүтээж буй дүр чинь өөртэй чинь хэр адилхан хүн байв?
Бүтээж буй дүр маань хөгжилтэй, цайлган, гэнэн эмэгтэйн дүр. Надтай зан чанар болоод насны хувьд ерөнхийдөө адилхан байсан.
-Гол дүрийн эрэгтэй жүжигчин Япон хүн байгаа. Хэрхэн хоорондоо ойлголцож байгаа вэ?
-Эхлээд дохио зангаагаар ойлголцдог байсан. Гэхдээ Японы жүжигчин Ишида Такуяа киноны турш монголоор ярьж байгаа. Би ганцхан хэсгийн зураг авалтанд л япон хэлээр ярьсан.Бие биендээ мэдэхгүй чадахгүй байгаа зүйл дээр нь туслаад л явж байна. Ялангуяа хэлний тал дээр. Үгээ буруу хэлэх хэлж чадахгүй байгаа нөхцөлд зааж засаж өгдөг.
-Өмнө нь нэлээдгүй олон кинонд тоглож байсан. “Багшаа ….Монгол залуусын бэйсболын тэмдэглэл” өөрийн тань хувьд хэд дэх кино вэ?
– Гол дүрийн хувьд 4 дэх дүр . Туслах дүрүүд бол олон байгаа.
– Солонго эмэгтэй дүрд тоглооч ээ гэсэн саналыг хэн тавьсан бэ?
-Киноны маань дүрийн шалгаруулалт 3 сард эхлэсэн.Нэг өдөр Г.Бадамрагчаа найруулагч над руу яриад “Энэ киноны гол дүрд чи л яг тохирох юм шиг санагдаад байна. Хүрээд ир” гэсэн. Тэгээд л шалгаруулалтанд орж тэнцсэн.
Баярлалаа. Уран бүтээлийн өндөр амжилт хүсье.
Д.Төгс
