Гавьяат жүжигчин, поп хатагтай Б.Сарантуяа гарынхаа ганц шавиар үргэлж бахархдаг. Тэр нь “Оддын эрэлд-2005” наадмын ялагч, “Universe best songs” наадмын шилдэг оролцогчоор шалгарсан Улсын филармонийн гоцлол дуучин Л.Насанбуян юм. Авьяаслаг, царайлаг дуучин бүсгүй поп хатагтайд хадаг, сүү барин шавь орсноор уран бүтээлийнхээ замналыг эхэлсэн бөгөөд “Давтагдашгүй” нэртэй анхны бие даасан цомгоо хүртэл гаргасан. Ийн поп хатагтайн шавь төдийгүй итгэлтэй туслах нь болсон дуучин бүсгүй Б.Сарантуяагийн уран бүтээлийн ажил, шоу тоглолтод байнга оролцдог давхар ажилтай гэдэг нь мэдээж.
Тиймдээ ч поп хатагтайн аялан тоглолтын бэлтгэл ажлыг хангаж, бүхий л асуудлыг нь зохицуулдаг бөгөөд багшийнхаа итгэл найдварыг хүлээсэн авьяаслаг, үнэнч туслагч болохоо сайтар харуулдаг ажээ. Харин поп хатагтай маань шавийнхаа талаар “Би хэзээ ч хуулбар бүтээгдэхүүн гаргахгүй. Сүүлийн үед гарч байгаа энэ одонцоруудаас миний шавь “А” үнэлгээ авсан ориг бүтээл гэдгээрээ ялгарна” гэж ам бардам өгүүлсэн билээ. Юутай ч, поп хатагтайн “ориг” бүтээл буюу дуучин Л.Насанбуян түүний амьдрал, уран бүтээлийн амьд гэрч гэдэг утгаараа бүх л ажилд нь гар бие оролцдог юм билээ.
Р.Есүй
