Эх дэлхий, байгалиа хайрлан дуулах, хадгалан хамгаалах зорилгын дор олон улсын яруу найрагчид нэгдэн ирэх есдүгээр сарын 8-аас 17-ны хооронд онгон байгальд зохиох “Алтан гөрөөс” уншлага, аялал наадам зохион байгуулахаар болжээ. Тус наамдыг манай оронд зохиох бөгөөд олон улсын яруу найрагчид Дорноговь аймгийн Хамрын хийд, Эргэлийн зоо зэрэг байгалийн үзэсгэлэнт газраар аялаж, Заан-Тэрэлжид чуулах юм.
“Алтан гөрөөс” уншлагыг Монголын зохиолчдын эвлэл, Дорноговь аймгийн Засаг Даргын Тамгын Газар, Бельгийн вант Улс дахь Монгол Улсын өргөмжит консул Паул Ван Воувэ болон утга зохиолын "Хөх Мэдрэхүй" бүлгэм зэрэг байгууллагаас хамтран зохион байгуулах аж. Энэхүү уншлагад оролцогсодын тоо хязгаартай бөгөөд гадаад орнуудаас 15, Монголын талаас 10, нийт 25 яруу найрагчыг оролцуулахаар төлөвлөжээ. “Алтан гөрөөс” уншлагын наадамд МҮОНР-гийн Нийгэм, эдийн засгийн редакцийн ерөнхий редактор Ц.Бавуудорж, Т.Эрдэнэцогт нар оролцоно гэж МҮОНР-гийн Олон нийтийн мэдээлэл судалгааны төвөөс мэдээллээ.
Б.Дэжид
