Бүх төрөл, жанарын дуучдын хувьд ид сезоны улирал үргэлжилж байгаа аж. Наадмаас хойш дуучид Цагаан сар хүртэл өндөр орлоготой байдаг аж. Наадмын дараа аймаг, сумын наадмуудаар нутгийн болон морины сэдэвтэй дуу дуулдаг дуучид халтуур гэж нэрлэдэг ажил ихтэй байдаг бол хайрын болон найрын сэдэвтэй дууны уран бүтээлчид намрын гурван сар ядаргаанд ортлоо ажилладаг ажээ.
Энэ жилийн хувьд Луу жил гээд хурим, найр цөөхөн гэх боловч Хуримын ордны захиалгууд, рестораны захиалгууд их байгаагийн сацуу нийтийн дууны голдуу уран бүтээлчид ашиг, орлого ихтэй ажиллаж байгаа аж. Хэн ч танихгүй уртын дуучин л гэхэд хүүхдийн үсний найранд дуулахын төлөө 300 мянган төгрөг нэхэж байгаа гэнэ. Мөн СУИС-ийн дуулаачин ангийн оюутнууд 50-100 мянган төгрөгөөр өөртөө таарсан халтуурын ажил хийж байгаа аж.
Ямартаа ч хуриманд дуулах хамгийн өндөр ханшийг МУСТА Б.Хишигбаяр, Р.Дэлгэрмаа нар тогтоогоод байгаа бөгөөд нэг сая төгрөгөөр, хямдруулж дуулахдаа 800 мянган төгрөгөөр дуулж байгаа гэнэ. Хурим, найрын арга хэмжээнээс гадна есдүгээр сарын 1-нээс эхлэн хөл хөдөлгөөн ихэссэнтэй холбоотойгоор төрөл бүрийн тоглолт, шоу цэнгээнүүд үзэгчдийг уйдаахгүй бололтой. Ийнхүү улсад нэг ч төгрөгний татвар төлдөггүй дуучид ашиг орлого ихтэй л яваа аж.
П.Сүндэр (www.wikimon.mn)
