Аврагч Христосын сүмд “панк мөргөл” хийсэн гэх “Pussy Riot” хамтлагийнхан телевизээр уучлалт гуйхаас татгалзжээ. “Панк мөргөл” гэдэг нь шашны эсрэг, дайсагнасан утгатай мөргөл аж. Тэднийг өнгөрсөн хоёрдугаар сард Үнэн алдартны шашны гол сүм Москвагийн Аврагч Христийн сүмийн тахилын газар дээрх үйлдэлийг хийсэн гэж үзэн тус улсын шүүхээс хоёр жилийн хорих ял оноосон билээ.
Уучлалт хүсэх санаачлагыг Оросын телевизийн нэгдүгээр сувгийн “Хүн ба хууль” нэвтрүүлгийнхэн гаргасан байна. Харин дээрх хамтлагийн нэгэн гишүүний нөхөр нь энэ сувгаар дамжуулан тэд уучлалт гуйхгүй хэмээн мэдэгдэв. Тэрээр ярихдаа, Энэ бол доромжилсон хэрэг. Тэртээ тэргүй хоригдож байгаа бүсгүйчүүдийг дахин доромжлох гэж байна” гэжээ.
Хэрэв “Владимир Путин өөрөө гэм буруутай гэдгээ зөвшөөрч сүмд хоригдоход бэлэн гэдгээ хүлээн зөвшөөрсөн тохиолдолд бүсгүйчүүд уучлалт гуйх болно”гэж тэрээр нэмж хэлэв. Мөн энэ үеэр тэдний өмгөөлөгч нь “Хүн ба хууль” нэвтрүүлгийг “хуурамч” хэмээн нэрлээд “Энэ нэвтрүүлгэтэй хамтарч ажилласан туршлага бий. Өмгөөлөгчдийн бодлыг байнга хасдаг. Үнэн хэрэгтэй их хуурамч, бохир нэвтрүүлэг” гэж онцолжээ.
