Урлагийн ертөнцдөө эргэн ирж, уран бүтээлээрээ сонсогч фэнүүдтэйгээ дахин уулзаж буй Соёлын тэргүүний ажилтан, дуучин С.Сэрчмаа ийнхүү зар тараажээ. Тэрбээр шинэ дуундаа клип хийхээр зэхсэн бөгөөд ирэх даваа гарагийн үдэш “I-loft function house”-д зураг авалтаа хийх гэнэ. Энэ тухайгаа дуучин С.Сэрчмаа “Клип маань маш сонирхолтой үйл явдлаар өрнөх юм. Тиймээс олон хүн оролцох шаардлагатай боллоо. Хэрэв миний клипэнд тоглохыг хүсвэл хэн дуртай нь ирж болно. Би эхний 200 хүнд шинэ цомгоо бэлэглэж, сюрприз барихыг хүсч байна” гэж фэйсбүүк хуудсаараа дамжуулан уриалжээ. Харин түүний фэн залуус олны хэсэгт бус царайлаг дуучны найз залуу юмуу дурлалт эрийнх нь дүрд тоглохыг маш их хүсч буйгаа дуулгасан байна. Мэдээж хэрэг, С.Сэрчмаагийн шинэ клипний зохиол нууцлагдмал байгаа учраас хайр дурлалын хэсэг багтсан эсэх нь эргэлзээтэй юм. Юутай ч, дуучин бүсгүйн фэнүүд түүний шинэ уран бүтээлд дүрээ мөнхлөхийг хүсвэл “I-loft function house” руу урагшаа.
Р.Есүй
