Дэлхий хавтгай бөгөөд үлэмж биет хоёр зааны нуруун дээр тогтоно. Харин хоёр заан аварга том яст мэлхийний нуруун дээр оршдог тухай домгоор эртний хүмүүс ертөнцийн үүслийг тайлбарладаг байв. Гэвч үнэн хэрэгтээ уг домог хамгийн зөв тайлбар ч байж болохыг зураач Х.Ууганбаярын шинэ бүтээлийг харж зогсох үедээ бодсон юм.
Байгаль, хүн хоёрын шүтэлцээ гэдэг “Ой, модоо хайрлан хамгаалъя”, “Голд хог бүү хая” тэргүүтэй улиг болсон урианаас тэс ондоо холбоо болохыг түүний бүтээлүүдээс харж болно. Гэхдээ тэдгээр бүтээл байгалийг хуулбарласан зураг огтоос биш бөгөөд хувь уран бүтээлчийн бодол санаанд хэлбэрээ олсон өвөрмөц тусгал билээ. Үлгэр домгийн сэдэв, симболизмтой сүлэлдсэн түүний бүтээлүүд нууцлаг түүхийг хүүрнэх мэт санагддаг. Хэрвээ та тэрхүү түүхийг чагнахыг хүсвэл энэ сарын 19 буюу лхагва гаригт “Цагаандариум” арт галерейг зориорой. Зураач Х.Ууганбаярын “Сансраас унасан үлгэр” үзэсгэлэн ирэх сарын 7 хүртэл үргэлжилнэ.
Э.Ийнгаа
