Сүүлийн үед Монголд зохиогдож буй хамтлаг, дуучдын бүх том тоглолтыг On’n Off продакшны захирал С.Ононбат найруулж байгаа. Тоглолт бүрийг дахин давтагдашгүйгээр найруулдаг тул манайхан түүнийг л зорин очдог гэлцэх юм билээ. Зориод ирсэн хамтлаг, дуучдад С.Ононбат ганцхан хатуу шаардлага тавьдаг байна. Энэ нь амьд хөгжимтэй дуулах. “Дэлхий дээр зохиогдож байгаa бүх том шоу тоглолт амьд хөгжимтэй явдаг болсон. Амьд хөгжимтэй тоглох үнэхээр гоё шүү” хэмээн хэлдэг гэнэ. Зарим нь энэ шаардлагад ихэд барьц алдан, мэгддэг гэсэн. Харин бэлтгэлийн явцад амьд хөгжмийн дуугаралт, өөрийгөө шинээр нээн харуулах давуу талыг ойлгон “Ноно ахын зөв байна” хэмээн зөвшөөрөн хэлэлцдэг гэнэ. Одоо түүний найруулж байгаа хөгжмийн зохиолч Г.Пүрэвдоржийн “Нандин эрдэнэ” тоглолт ч энэ жишгээр тавигдаж байна. Өдөр бүр СТӨ-ний хоёр давхарт тоглолтонд оролцох 20 орчим уран бүтээлчид ээлжлэн амьд хөгжим дор бэлтгэлээ базааж байгаа нь тус тоглолтыг үзүүштэй, мартагдашгүй сайхан болгох нь хэмээн хүлээлтийг үүсгээд байна.
М.Жаргал
