Орхон аймгийн Нийтийн номын сан үүсэн байгуулагдсаны 50 жилийн ой есдүгээр сарын 17-нд тохиолоо.
Эрдэнэт хотын ууган соёлын байгууллагуудын нэг тус номын сан нь хагас зуун жилийн хугацаанд иргэдийг номтой нөхөрлүүлж, мэдлэг боловсролоо дээшлүүлэхэд нь дэмжлэг үзүүлж иржээ.
Өдгөө 35 мянга гаруй ном, хэвлэлийн бүтээл бүхий сан хөмрөгтэй бөгөөд жилд дунджаар 60 мянга гаруй иргэнд үйлчилдэг байна.
2024 онд орон нутгийн төсвийн 4.6 тэрбум төгрөгийн хөрөнгө оруулалтаар барьсан “Номын өргөө” цогцолборыг ашиглалтад оруулжээ. Ингэснээр номын сангийн үйлчилгээний орчин, иргэдэд хүрэх боломж нэмэгдсэн байна.
Номын сангийн 50 жилийн ойд зориулсан баярын жагсаал өчигдөр болж, А.Амарын талбайд номын үзэсгэлэн дэлгэлээ. Үзэсгэлэнд номын сангийн сан хөмрөгт хадгалагдаж буй бүтээлүүдээс танилцуулж, иргэдэд номын сангийн үйл ажиллагаа, үйлчилгээг сурталчилж байна. Мөн соёл, урлагийн байгууллагын ажилтан, алба хаагчдын дунд спортын тэмцээн зохион байгуулж, үе үеийн номын санчдад хүндэтгэл илэрхийллээ.
Цаашид номын сан нь орчин үеийн “Номын өргөө”-ний боломжийг ашиглан хүүхэд, залуучуудын ном унших сонирхлыг нэмэгдүүлэх, иргэдэд номын сангийн үйлчилгээг илүү хүртээмжтэй хүргэхэд анхаарч ажиллаж байна.
