Холливудын кино академийн төлөөлөгч өчигдөр мэдэгдэл хийхдээ ирэх оны “Оскар”-т нэр дэвшигчдийг тодруулах цаг хугацааг танилцууллаа.
AFP-ийн мэдээлснээр ирэх оны нэгдүгээр сарын 10-нд “Оскар”-т нэр дэвшигчид тодорно. Академийн удирдлагууд өнгөрсөн таван өдрийн турш хуралдаж энэхүү товыг гаргасан байна.
Өчигдөр хийсэн мэдэгдлээс үзвэл ирэх оны хоёрдугаар сарын 24-нд Лос-Анжелесын “Долби театр”-т “Оскар”-ын шагнал гардуулах 85 дахь удаагийн ёслол болох аж.
Академийн төлөөлөгч AFP-д өгсөн ярилцлагадаа “Ирэх оны наадмын тухай одоо ярихад эрт байна. Төсөв зардлын хувьд багасгахаар яригдаж байгаа. Кино компаниуд бүтээлээсээ олж байгаа ашиг нь тодорхой хэмжээнд буурсан. Бид бэрхшээлийг шийдвэрлэж чадна” гэжээ.
Ирэх арванхоёрдугаар сарын 17-ноос олон улсын болоод АНУ-ын кино, телевиз, урлагийн 6000 мэргэжилтэн “Оскар”-т нэр дэвшүүлэх жүжигчин, кино болон бусад шагналтныг тодруулахад саналаа өгч эхэлнэ. Энэ онд анх удаа санал хураалтыг онлайнаар явуулна. 6000 хүн нь кино академийн албан ёсны гишүүд юм.
Т.Арьяа
