Морин хуурын чуулга энэ жил 20 нас хүрлээ. Тус байгууллагынхан энэ ойдоо зориулан олон арга хэмжээ төлөвлөөд байгаагийн нэг нь өчигдөр, өнөөдөр, маргааш Соёлын төв өргөөнд болох “Монголын сайхан орон” тоглолт юм. Гэхдээ энэхүү тоглолт нь гурван өөрөөр эгшиглэх юм байна. Тодруулбал эхний тоглолтод дан Монголын шилдэг уран бүтээлчдийн хөгжим, аялгуу эгшиглэх бол хоёр дахь нь буюу өнөөдөр дэлхийн хөгжмийн болон дууны бүтээлүүдийг морин хуураар хэрхэн амилуулахыг үзүүлэх юм байна.
Харин маргааш Монголын болон дэлхийн шилдэг бүтээлүүдийг нэг дор сонсгох ховорхон боломжийг үзэгчдэдээ бүрдүүлэх аж. Өчигдрийн хувьд тоглолтын салхийг Төрийн шагналт, урлагийн гавьяат зүтгэлтэн Э.Чойдогийн “Монголын сайхан орон”-оор хагалсан. Харин хаалтыг мөн л Төрийн шагналт, урлагийн гавьяат зүтгэлтэн Б.Шаравын “Сэрсэн тал”-аар үдсэн. Тоглолтод Ардын жүжигчин Ш.Чимэдцэеэ Монгол ардын дуу “Урьхан хонгор салхи”-ийг шуранхайлуулсан бол, А.Долгор “Магнаг цэнхэр аялгуу”-г эгшиглүүлсэн юм. Түүнчлэн гавьяат жүжигчин Цагдаагийн “Сүлд” чуулгын гоцлол дуучин Г.Ариунбаатар “Буйрын цэнхэр хөвөөнд” дуугаар үзэгчдэдээ ая өргөв. Удирдаачаар ардын жүжигчин, профессор Ц.Батчулуун, Д.Түвшинсайхан нар ажилласан. Харин хөтлөгчийн үүргийг гавьяат жүжигчин Г.Равдан хүлээсэн байв. Тоглолтын найруулгыг Төрийн хошой шагналт, Ардын жүжигчин Н.Жанцанноров хийжээ. Тэрбээр тоглолтын үеэр хөшигний ард орж хөгжимчдөдөө “Үзэгчид сайхан хүлээж авч байна. Зөв л номер бэлдэж” хэмээгээд Г.Равдан, Д.Түвшинсайхан нартай хэсэг ярилцаж байгаад гарч явна билээ.
У.Баяраа
