Лос-Анжелесийн Холливудын толгод дээрх "HOLLYWOOD" ("Холливуд") гэсэн цуутэй үгийг сэргээн засварлаж байгаа тухай The Hollywood Sign сайтад мэдээлжээ. Алдартай үгийг бүтээсний 90 жилийн ой ирэх онд болох бөгөөд энэхүү ойг угтуулан хийж буй уг засварыг аравдугаар сарын эхээр хийж эхэлжээ. Ажилчид 15 метр өндөр үсэгнүүдийн тоос шороо, зэвийг арилгаад нийт есөн үсгийг цагаанаар будна. Засварт 400 галлон буюу 1,5 мянган литр будаг зарцуулах бөгөөд засвар арван долоо хоног үргэлжлэх гэнэ.
Холливудын толгод дээр үсгийг анх 1923 онд бүтээсэн. Эхлээд Уг районы орон сууцны хорооллын сурталчилгаа болгон "HOLLYWOODLAND" гэсэн үг байсныг 1940 онд сүүлийн дөрвөн үсгийг хасч Америкийн кино урлагийн үйлдвэрийн бэлгэдэл болгон үлдээсэн.
1970-аад оноос есөн үсэг тус бүр нь өөрийн ивээн тэтгэчтэй болсон байна. Хамгийн сүүлд үгийг 2005 онд засварлан сэргээжээ. Одоо уг үгийг аюулгүй байдлын дохиолол, бичлэгийн төхөөрөмжөөр тоноглоод байгаа. Өмнө нь үсгийг эвдлэх оролдлого гарч байлаа. Мөн үсэг дээрээс үсрэн амиа хорлох тохиолдол гарч байлаа. Жишээлбэл 1932 онд жүжигчин эмэгтэй Пег Энтуисл "H" үсгэн дээрээс үсрэн амиа хорложээ
Бэлтгэсэн Ш.Мягмар
